Xiaomi zarýad beriş stansiýasy: ähli zerurlyklar bir ykjam blokda
Xiaomi birnäçe enjamy bir wagtda tok bilen üpjün edip bilýän we adaty rozetkalaryň ornuny tutýan Xiaomi Desktop Charging Station 140W atly stoluň üstündäki zarýad beriş stansiýasyny tanyşdyrdy.
Enjamyň ykjamlygy aýratyn üns çekýär: onuň ölçegleri bary-ýogy 95 × 71 × 53 mm, agramy bolsa 493 g, bu bolsa ony iş stolunda ýa-da tumboçkada amatly ýerleşdirmäge mümkinçilik berýär.
Stansiýa iki sany USB-C porty bilen üpjün edilip, olaryň hersi 140 Wt çenli kuwwat berýär. Bu bolsa noutbuklary we häzirki zaman smartfonlaryny çalt zarýadlamak üçin amatlydyr. Şeýle hem iki sany USB-A porty bolup, olar 120 Wt çenli kuwwaty goldaýar we planşetleri hem-de beýleki gajetleri birikdirmäge mümkinçilik berýär.
Mundan başga-da, enjamda öý tehnikasy, mysal üçin, çäýnek ýa-da stol çyrasy üçin niýetlenen dört sany doly derejeli rozetka göz öňünde tutulypdyr. Toplumda 240 Wt çenli kuwwaty geçirmäge ukyply USB-C kabeli bar, bu bolsa zarýad beriş prosesini has-da çaltlaşdyrýar.
Youpin platformasynda stansiýanyň çykarylmagy üçin serişdeleri ýygnamak başlandy: kampaniýa gatnaşyjylary üçin bahasy 250 ýuan (35 ABŞ dollary) boldy. Bölek satuwda bolsa enjamyň bahasy has ýokary — 300 ýuan (43 ABŞ dollary) bolar.
ORIENT
