Lenovo emeli aňly akylly äýnekleri hödürledi: terjime, telesuflýor we multimediýa bir enjamda
CES 2026 sergisinde Lenovo kompaniýasy adam bilen daşky gurşawyň arasyndaky gatnaşygy üýtgetmegi maksat edinýän AI Glasses Concept atly akylly äýnekleriň konseptini tanyşdyrdy. Täze önüm iş proseslerini birleşdirip, emeli aňyň integrasiýasyny, multimediýa dolandyrylyşyny we dürli enjamlara laýyklygyny hödürleýär.
Agramy bary-ýogy 45 gram bolan äýnekler sensorly interfeýs we ses arkaly dolandyryş bilen üpjün edilendir. Olar saz diňlemäge, çykyşlar üçin telesuflýor funksiýasyny (tekst gözüň öňündäki ekranda görkezilýär) ulanmaga hem-de gürleýji tertipde jaňlary alyp barmaga mümkinçilik berýär.
Simsyz aragatnaşyk arkaly äýnekler smartfonda ýa-da kompýuterde işleýän Lenovo Qira emeli aň kömekçisi bilen baglanyşykda işleýär. Bu kömekçi diňlenen maglumatlaryň dessine terjimesini we suratlaryň akylly tanalmagyny üpjün edýär — maglumatlar mikrofonlar we kamera arkaly jübütlenen enjamda işlenilýär.
Catch Me Up atly ýörite funksiýa ulanyjylara bildirişler bilen tiz tanyşmaga kömek edýär: ol birnäçe enjamlardan gelen habarlaryň jemini görkezýär. Äýnekleriň özbaşdak iş wagty 8 sagada çenli ýetýär, bu bolsa olary uzak wagtlap ulanmak üçin amatly edýär. Lenovo-nyň pikirine görä, AI Glasses Concept günüň dowamynda emeli aňdan amatly peýdalanmagy üpjün edýän dakylýan enjam düşünjesini durmuşa geçirýär.
ORIENT
