Qatar Airways dünýäde ilkinji bolup Boeing 787 uçarlaryny Starlink hemra interneti bilen enjamlaşdyrdy
Qatar Airways awiasiýa taryhyna Boeing 787-8 uçarlarynda Starlink hemra internet ulgamyny ornaşdyran ilkinji awiakompaniýa hökmünde girdi. Häzirki wagtda kompaniýa ýokary tizlikli internet bilen üpjün edilen şeýle üç uçary ulanýar, Starlink bilen enjamlaşdyrylan giň göwrümli uçarlaryň umumy sany bolsa 120-ä golaýlaýar. Bu ýagdaý Qatar Airways-e SpaceX ulgamyna birikdirilen uzak aralyga uçýan uçarlaryň dünýäde iň uly düzümine eýe bolan operatorlaryň sanawynda öňdebaryjy orny eýelemäge mümkinçilik berýär.
Taslama örän ýokary tizlikde durmuşa geçirilýär. 2025-nji ýylyň dekabrynda awiakompaniýa bary-ýogy sekiz aýyň dowamynda ähli Airbus A350 düzümini enjamlaşdyrdy — bu bolsa şeýle başlangyçlar üçin görlüp-eşidilmedik möhletdir. Jemi 14 aýyň içinde Starlink Boeing 777 we Airbus A350 uçarlarynda gurnaldy, soňra maksatnama Boeing 787 uçarlaryna hem giňeldildi. Bu raýat awiasiýasynyň taryhynda giň göwrümli uçarlarda hemra internetiniň iň çalt we iň giň gerimli ornaşdyrylmagydyr.
Häzirki wagtda Qatar Airways düzüminiň 58 göterimden gowragy ýolagçylara sekuntda 500 Mbit-e çenli internet tizligini hödürleýär. 2024-nji ýylyň oktýabryndan bäri mugt internet hyzmatyndan 11 milliondan gowrak ýolagçy peýdalandy. 2025-nji ýylda Starlink ulgamyna elýeterlilik alan dünýä boýunça 21 million ýolagçynyň takmynan ýarysy Qatar Airways-iň uçuşlary bilen syýahat etdi.
ORIENT
