Gumanoid tikinçilik sungatyny özleşdirdi: emeli aňyň täze öňegidişligi
Hytaýyň TARS Robotics kompaniýasy ýumşak matalar bilen işläp bilýän roboty tanyşdyrdy. Tomaşaçylaryň gözüniň alnynda gumanoid robot sapagy iňňä bilen ünsli geçirip, çylşyrymly nagyşy keşdeläp çykdy. Bu uly täzelige öwrüldi, sebäbi çeýe materiallar bilen işlemek enjamlar üçin elmydama iň kyn meseleleriň biri bolup gelýärdi.
Mata hemişe görnüşini üýtgedýär, şonuň üçin robot diňe hereketleri gaýtalamak bilen çäklenip bilmez. Ol sapagyň dartgynlygyny duýmaly we her bir üýtgeşmä dessine uýgunlaşmaly. Şu wagta çenli beýle takyklyk diňe adam ellerine mahsus hasap edilýärdi.
Bu üstünlik TARS DATA AI PHYSICS tehnologiýasynyň netijesinde gazanyldy. Inženerler emeli aňy diňe buýruklary ýerine ýetirmäge däl-de, predmetleriň fizikasyna düşünmäge öwretdiler. Ilki robot sanly gurşawda türgenleşýär, soňra bolsa kemsiz başarnyklaryny ýalňyşsyz hakyky durmuşa geçirýär.
Baş direktor Çen Ilunyň sözlerine görä, tikinçilik diňe bir mysaldyr. Şol bir tehnologiýa robotlara uçarlar üçin çylşyrymly sim ulgamlaryny ýygnamaga, elektronikada bölekleri gurnamaga we lukmanlara mikrohirurgiýada kömek etmäge mümkinçilik berer.
Taslama eýýäm 240 million dollar möçberinde maýa goýumyny özüne çekdi. Senagat tarapyndan ýokary islegiň bolmagy ýakyn wagtda şeýle gumanoidleriň önümçiligiň iň inçe we takyk ugurlarynda adamlaryň ornuny tutjakdygyny tassyklaýar.
ORIENT
