Bitkoin garaşma ýagdaýynda: bilermenler $100 000 derejesine täze öňegidişligi çaklaýarlar
Kriptowalýuta bazary «dartgynly garaşma» tapgyryna girdi. Wakalara doly geçen ýyldan soň, maýadarlar täze ykdysady duýduryşlaryň öňüsyrasynda saklanýarlar. GIS Mining kompaniýasynyň baş direktory Wasiliý Girýanyň belleýşi ýaly, häzirki wagtda bitkoin gysylan çeşmä meňzeýär: söwda işjeňligi wagtlaýynça pese gaçdy, emma iri saklaýjylar soňky iki ýylyň dowamynda iň köp möçberde teňňe topladylar.
Häzirki wagtda bazar $80 000 – $84 000 aralygyndaky güýçli goldaw zolagy bilen saklanýar. Bu taryhy taýdan möhüm dereje bolup, bitkoini pese gaçmakdan goraýar.
Işjeň ösüşiň täzeden başlamagy üçin bitkoine $90 000 derejesinden ýokary berk orun almak zerurdyr. Eger ýakyn wagtda bahasy bu derejeden ýokary saklansa, gysga möhletli maksat hökmünde $94 500 derejesine ýol açylar. $95 500 derejesiniň bozulmagy bolsa «domino effekti» döredip, 2026-njy ýylyň ýanwar aýynyň ahyryna çenli bahany psihologik taýdan möhüm bolan $100 000 derejesine tarap getirip biler.
Derňewçileriň pikirine görä, täze ösüş tapgyrynyň esasy hereketlendirijisi kriptodünýäden gelýän täzelikler däl-de, ABŞ-nyň ykdysadyýetindäki üýtgeşmeler bolar. Esasy faktor hökmünde ABŞ-nyň Federal ätiýaçlandyryş ulgamynyň (FÄU) ýumşak pul-karz syýasaty ýa-da zähmet bazary baradaky statistiki maglumatlar çykyş edip biler. Bu duýduryşlar alynýança, bahalar dar diapazonda üýtgäp, satyn alyjylaryň niýetlerini barlar.
Bahalaryň üýtgeýänligine garamazdan, senagat möçberindäki maýning durnukly ösmegini dowam etdirýär. Russiýa bitkoini almak boýunça dünýäde ikinji orny saklaýar. Bu ugur ýurt üçin strategik taýdan möhüm bolup, maliýe özygtyýarlygyny pugtalandyrýar hem-de ykdysadyýetiň täze ýokary tehnologiýaly pudagynyň kemala gelmegine ýardam berýär.
ORIENT
