Türkmenistanyň we HHR-nyň hünärmenleri Kunminde energiýa köprülerine hyzmat etmegiň usullaryny kämilleşdirdiler
Kunmin, 23-nji dekabr | ORIENT. Hytaýyň Kunmin şäherinde (Ýunnan welaýaty) Türkmenistanyň energetika pudagynyň tehniki hünärmenleri hem-de degişli edaralarynyň wekilleri üçin niýetlenen ýöriteleşdirilen okuwlary tamamlandy.
Okuw maksatnamasy serhetara nebitgaz infrastrukturasyna gözegçilik etmek we onuň howpsuzlygyny üpjün etmegiň öňdebaryjy usullaryna bagyşlandy.
Energiýa üpjünçiliginiň bökdençsizligi, ilki bilen, ýokary tehnologiýalara we öňüni alyş tehniki hyzmatlara baglydyr. Hytaýda geçirilen bäş günlük intensiw okuw türkmen inženerlerine hem-de degişli gulluklaryň wekillerine daglyk we çylşyrymly relýef şertlerinde iň çylşyrymly turbageçiriji ulgamlary dolandyrmagyň innowasion çemeleşmelerini tejribede synap görmäge mümkinçilik berdi.
Hytaý Halk Respublikasynyň Adatdan daşary ýagdaýlar ministrliginiň goldamagynda guralan okuw maksatnamasy «nazaryýet + hünär taýýarlygy» nusgasynda geçirildi.
Okuwçylara iş basyşy astynda ulgamlary germetizasiýa etmek usullary, düwünleri tiz wagtda çalyşmagyň häzirki zaman tehnologiýalary hem-de magistral turbageçirijileriň bitewiligine awtomatlaşdyrylan gözegçilik ulgamlary öwredildi.
Tehniki hyzmatlar geçirilende daşky gurşawa islendik täsirleriň öňüni almaga mümkinçilik berýän dessine jogap beriş ulgamlaryna aýratyn üns berildi.
Okuwyň iň möhüm tapgyry amaly sapaklar boldy. Şol ýerde türkmen hünärmenleri Kunmin şäherindäki Milli nebitgaz turbageçirijileri müdirliginiň bölüminiň hytaýly kärdeşleri bilen bilelikde sazlaşykly hereketleri görkezdi. Hakyky wagt tertibinde özara hyzmatdaşlygyň algoritmleri işlenip taýýarlandy. Okuwuň özboluşly bölegi hökmünde daglyk şertlerde turbageçirijileriň barmasy kyn bolan ýerlerine tehniki enjamlary eltip bermek boýunça amaly işler ýerine ýetirildi.
Hytaýly guramaçylar bu çäreleriň «Bir guşak, bir ýol» başlangyjynyň çägindäki uzak möhletli strategiýanyň bir bölegidigini belleýärler. Bilelikdäki işgärleri taýýarlamak strategik magistrallaryň ulanylyş ygtybarlylygyny yzygiderli ýokarlandyrmaga, sebitde energiýa üpjünçiliginiň durnuklylygyny üpjün etmäge hem-de howpsuzlyga gözegçilik etmegiň bitewi sanly standartlaryny ornaşdyrmaga mümkinçilik berýär.
Hytaýa energiýanyň esasy üpjün edijileriniň biri bolmak bilen, Türkmenistan öz eksport mümkinçilikleriniň tehnologik kämilligine we howpsuzlygyna ileri tutulýan ähmiýet berýän jogapkärli hyzmatdaş hökmünde derejesini tassyklaýar.
