Paýhas hüjümi: Aşgabatda «ÝB 2025 Gyşky kubogy» nähili geçdi
Aşgabat, 22-nji dekabr | ORIENT. Türkmenistanyn paýtagtynda gatnaşyjylary Ýewropanyň Täze ýyl ruhuna beslän, emma adaty bolmadyk — intellektual formatdaky çäre geçirildi. Ýewropa Bileleşiginiň wekilhanasy baýramçylyk mynasybetli bäşinji, ýubileý «Gyşky kubok 2025» ýaryşyny gurap, rekord derejede köp sanly «bilermenleri» bir ýere jemledi.
Jogaba oýlanmak üçin bary-ýogy 60 sekunt berilýän ýagdaýda, logika we toparlaýyn iş esasy gural bolup çykyş edýär. Şu ýyl ýaryş köpçülikleýin gatnaşyk boýunça ähli rekordlary täzeledi: 51 topar we 300-den gowrak gatnaşyjy zaly ýaşlyk hyjuwynyň we baýramçylyk ruhunyň hakyky merkezine öwürdi.
Ýubileý kubogy Türkmenistanda intellektual oýunlar görnüşiniň uly ösüşe eýe bolýandygyny görkezdi. Ýaryş 12 ýokary okuw mekdebiniň ýygyndy toparlaryny, mekdep okuwçylarynyň toparlaryny, şeýle hem ýaş hünärmenleri birleşdirdi. Soraglar türkmen we rus dillerinde berildi, bu bolsa bäsleşigi hemmeler üçin açyk we düşnükli etdi.
Ýaryşyň temasy — Ýewropanyň täze ýyl däpleri — oýunçylardan diňe bir giň bilim däl-de, eýsem medeni özboluşlylyga çuňňur düşünmegi hem talap etdi. Dartgynly saýlama tapgyrlardan we jemleýji intellektual söweşden soň döredijilikli atlary bolan ýeňijiler üçlügi kesgitlendi:
- «N K B» — «Gyşky kubok 2025»-iň eýeleri.
- «Şokolad baýguşy» — ikinji orun we kemsiz logika.
- «Ýylgyrýarys we ellerimizi galgatýarys» — bürünç medal we iň hoşniýetli topar ady.
Çärä aýratyn ruhy ýagdaýy janly aýdym-saz goşdy. Tapgyrlaryň arasyndaky arakesmelerde, dartgynlylyk artýan pursatlarda, meşhur aýdymçy Şad Öwez çykyş edip, gurşawy has-da baýramçylykly şowhuna öwürdi. Onuň sahna çykyşlary ýaşlar tarapyndan şowhunly el çarpyşmalar bilen garşylanyp, doly manydaky baýramçylygy döretdi.
«Gyşky kubok» eýýäm adaty bäsleşigiň çäklerinden çykdy. Häzirki wagtda ol medeni dialog we resmi däl aragatnaşyk üçin durnukly meýdança bolup hyzmat edýär. Şeýle başlangyçlar arkaly Ýewropa Bileleşiginiň Türkmenistandaky wekilhanasy iň möhüm ugra — ýaş nesilde tankydy pikirlenmäniň, adamlar arasyndaky baglanyşyklaryň we özara düşünişmegiň ösdürilmegine maýa goýýar.
