Türkmenistanyň Prezidentiniň Ýaponiýanyň Wekiller palatasynyň Başlygy bilen duşuşdy
TOKIO, 19-njy dekabr | ORIENT. Prezident Serdar Berdimuhamedow Ýaponiýa saparynyň maksatnamasynyň çäklerinde ýurduň Parlamentiniň Wekiller palatasynyň Başlygy Fukuşiro Nukaga bilen gepleşikler geçirdi. Duşuşykda döwletara gatnaşyklarynyň esasy guraly hökmünde parlament diplomatiýasyny güýçlendirmek meselesine üns berildi.
Fukuşiro Nukaga Ýaponiýanyň Türkmenistana Merkezi Aziýada strategik taýdan ähmiýetli möhüm hyzmatdaş hökmünde garaýandygyny nygtady. Şeýle hem, ol “EKSPO 2025”-däki türkmen pawilonynyň üstünligini belledi. Bu ýer Osakadaky Bütindünýä sergisine gelýänler üçin hakyky özüne çekiji merkeze öwrüldi.
Taraplar Türkmenistanyň Mejlisi bilen Ýaponiýanyň Wekiller palatasynyň parlamentara toparlarynyň işine ýokary baha berdiler. Bu diňe bir kanun çykaryjylyk işinde tejribe alyşmak däl, eýsem ynsanperwer ulgamda gatnaşyklar üçin hem köpri bolup hyzmat edýär.
Wekiller palatasynyň Başlygy Türkmenistanyň Baştutanyny Aşgabatda hemişelik Bitaraplygynyň 30 ýyllygyna bagyşlanan parahatçylyk we ynanyşmak forumynyň üstünlikli geçirilmegi bilen tüýs ýürekden gutlady hem-de ýurduň parahatçylyk söýüji başlangyçlarynyň abraýynyň barha artýandygyny belledi. Bu duşuşuk Prezident Serdar Berdimuhamedow bilen Wekiller palatasynyň başygy Fukuşiro Nukaganyň şu ýylyň dowamyndaky eýýäm ikinji duşuşygydyr (birinjisi aprel aýynda bolup geçdi), bu bolsa syýasy gatnaşyklaryň işjeňligine şaýatlyk edýär.
Häzirki wagtda türkmen-ýapon parlament gatnaşyklary ýokary derejä ýetdi. Şunuň netijesinde iki ýurduň kanun çykaryjy edaralary ýokary derejede düýbi tutulan giň gerimli ykdysady we medeni taslamalary durmuşa geçirmäge işjeň ýardam berýär.
