Türkmenistanyň Prezidentiniň “Türkmenistanyň Bitaraplygy – parahatçylygyň we ynanyşmagyň aýdyň ýoly” atly kitaby amerikan okyjylaryna hödürlener
Türkmenistanyň Daşary işler ministrliginde geçirilen duşuşygyň esasy temasy ýurduň parahatçylyk söýüjilik başlangyçlaryny öňe sürmekden ybarat boldy. Daşary işler ministriniň orunbasary Mähri Bäşimowa “FIT International” amerikan kompaniýasynyň ýolbaşçysy Kýort Edwards bilen geljek ýyl üçin bilelikdäki çäreleriň meýilnamasyny ara alyp maslahatlaşdy.
ABŞ-da edebiýat diplomatiýasy
Esasy wakalaryň biri Prezident Serdar Berdimuhamedowyň “Türkmenistanyň Bitaraplygy – parahatçylygyň we ynanyşmagyň aýdyň ýoly” atly kitabynyň tanyşdyrylyşy bolar. Tanyşdyryş dabarasy ABŞ-daky Türkmenistanyň Ilçihanasy bilen “FIT International” kompaniýasynyň bilermenleriniň goldawy bilen geçiriler. Bu çäräniň maksady amerikan syýasy we akademiki toparlaryny türkmen Bitaraplygynyň filosofiýasy we onuň sebitleýin howpsuzlygy üpjün etmekdäki orny bilen tanyşdyrmaga gönükdirilendir.
Ynsanperwer ugurlary giňeltmek
Medeni çärelerden başga-da, taraplar täze uly ugur — saglygy goraýyş we çagalary goramak babatda hyzmatdaşlyk etmek barada pikir alyşdylar: Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen ABŞ-nyň degişli guramalarynyň arasynda gatnaşyklary ýola goýmagyň mümkinçilikleri ara alnyp maslahatlaşylýar. Bu bolsa, gaznasyň ynsanperwer maksatnamalaryny durmuşa geçirmek üçin amerikan tejribesini we tehnologiýalaryny ulanmaga mümkinçilik berer.
Türkmenistanyň Garaşsyzlygynyň 35 ýyllygyna taýýarlyk
Şeýle hem, duşuşyk 2026-njy ýylda giňden belleniljek Türkmenistanyň Garaşsyzlygynyň 35 ýyllygyna taýýarlyk görmekligiň esasyny goýdy. Meýilnamalarda – medeni we bilim çäreleriniň giň gerimli maksatnamasy bar diýip, Türkmenistanyň DIM-i habar berýär.
Maglumat üçin: “FIT International” (ABŞ) köp ýyllaryň dowamynda Türkmenistan bilen hyzmatdaşlyk edip, Medeniýet günleriniň, işewürlik forumlarynyň we tanyşdyryş çäreleriniň gurnaýjysy bolup çykyş edýär hem-de dürli ugurlarda ikitaraplaýyn gatnaşyklary pugtalandyrmaga ýardam edýär.
ORIENT
