Gyrgyzystan Merkezi Aziýanyň energetika howpsuzlygyny üpjün etmekde Türkmenistanyñ goşandyna ýokary baha berýär
Aşgabat, 12-nji dekabr | ORIENT. Gyrgyz Respublikasynyň Prezidenti Sadyr Žaparow Halkara parahatçylyk we ynanyşmak ýylyna, Halkara bitaraplyk gününe hem-de Türkmenistanyň hemişelik bitaraplygynyň 30 ýyllygyna bagyşlanan «Parahatçylyk we ynanyşmak: durnukly geljegiň bähbidine maksatlaryň bitewüligi» atly forumda çykyş etdi.
Ol Türkmenistanyň Bitaraplyk syýasatynyň içerki syýasy durnuklylygy, jemgyýetdäki ylalaşygy üpjün edendigini, ýurduň yzygiderli ösüşi üçin berk binýady goýandygyny belledi.
Sadyr Žaparowyň bellemegine görä, Gyrgyzystan Türkmenistanyň sebit proseslerine, Merkezi Aziýanyň we goňşy sebitleriň energetika howpsuzlygyny pugtalandyrmakdaky goşandyna ýokary baha berýär.
Gyrgyz Respublikasynyň Prezidenti Türkmenistanyň durmuşa geçirýän gaz we energetika taslamalarynyň energiýa üpjünçiliginiň durnuklylygyny ep-esli ýokarlandyrýandygyny, bazarlary giňeldýändigini we özara bähbitli ykdysady hyzmatdaşlyk üçin goşmaça mümkinçilikleri döredýändigini aýtdy.
Şu nukdaýnazardan ol Türkmenistan bilen Gyrgyzystanyň elektrik energiýasyny ibermek babatda üstünlikli ýola goýlan hyzmatdaşlygyny belläp geçdi.
Şeýle-de Sadyr Žaparow ulag we logistika ulgamlarynda hyzmatdaşlygyň uly mümkinçilikleriniň bardygyny aýtdy. Gyrgyzystan multimodal ugurlary ösdürmäge, bar bolan ulag geçelgelerini giňeltmäge hem-de täze bilelikdäki logistika zynjyrlaryny döretmäge gatnaşmaga taýýar.
«Biziň ýurtlarymyz üçin ulag ulgamyny döwrebaplaşdyrmak we multimodal ugurlary ösdürmek esasy wezipeleriň biri bolmagynda galýar», – diýip, Sadyr Žaparow aýtdy.
Şu nukdaýnazardan Gyrgyz Respublikasynyň Baştutany Hytaý–Gyrgyzystan–Özbegistan demir ýoluny gurmak taslamasynyň, şeýle-de energetika ulgamynda Kambarata GES-1-iň gurluşygy taslamasynyň aýratyn ähmiýete eýe bolýandygyny nygtady.
Gyrgyzystan Türkmenistanyň 2025-nji ýyly «Halkara parahatçylyk we ynanyşmak ýyly» diýip yglan etmek baradaky BMG-niň Kararnamasyny kabul etmek başlangyjyna ýokary baha berýär. Sadyr Žaparow Türkmenistanyň Merkezi Aziýa döwletleriniň Baştutanlarynyň Konsultatiw duşuşygy ýaly özboluşly sebit formatyny pugtalandyrmakdaky işjeň orny barada hem belläp geçdi.
Onuň aýtmagyna görä, göni we ynamly dialoga esaslanýan bu gural umumy kynçylyklary ara alyp maslahatlaşmak we ylalaşylan çemeleşmeleri işläp düzmek üçin möhüm meýdança öwrüldi, bu bolsa häzirki şertlerde aýratyn zerur bolup durýar.
«Biz ýurtlarymyzyň öňünde parahatçylygy bilelikde pugtalandyrmak, gapma-garşylyklaryň öňüni almak we durnukly ösüşe ýardam bermek ýaly umumy wezipeleriň durýandygyna ynanýarys», – diýip, Gyrgyz Respublikasynyň Baştutany aýtdy.
Ol şu ýylda Özbegistan we Täjigistan bilen döwlet serhetleriniň hukuk taýdan resmileşdirilmeginiň üstünlikli tamamlanmagynyň bu ugurda möhüm ädim bolandygyny, munuň bolsa sebit howpsuzlygyny üpjün etmäge uly goşant goşandygyny hem-de parahatçylyk we hoşniýetli goňşuçylyk syýasatyna ygrarlylygy tassyklandygyny belledi.
