Türkmenistanyň bilen Russiýanyň Prezidentleri ikitaraplaýyn hyzmatdaşlygyň ileri tutulýan ugurlaryny ara alyp maslahatlaşdylar
Aşgabat, 12-nji dekabr | ORIENT. Türkmenistanyň Prezidenti Serdar Berdimuhamedow Halkara parahatçylyk we ynanyşmak forumynyň meýdançasynda Russiýa Federasiýasynyň Prezidenti Wladimir Putin bilen duşuşdy. Däp bolan dostluk we ynanyşmak ýagdaýynda geçirilen gepleşikler türkmen-rus gatnaşyklarynyň strategik häsiýetini we sebitleýin durnuklylyk üçin olaryň ýokary ähmiýetini tassyklady.
Serdar Berdimuhamedow rus kärdeşine Türkmenistanyň hemişelik Bitaraplygynyň 30 ýyllygyna bagyşlanan halkara foruma gatnaşmaga çakylygy kabul edendigi üçin minnetdarlyk bildirdi. Bellenilişi ýaly, bu Russiýa Federasiýasynyň Aşgabadyň daşary syýasatyny goldanylýandygynyň aýdyň subutnamasydyr.
Öz gezeginde, Prezident Wladimir Putin Türkmenistanyň oňyn Bitaraplyga esaslanýan daşary syýasatyna ýokary baha berdi. Russiýanyň Lideri bu syýasatyň doly esaslandyrylandygyny, sebäbi onuň sebitdäki ýagdaýy durnuklaşdyrmaga goşant goşýandygyny we köp ýurtlar, şol sanda Russiýa bilen ikitaraplaýyn gatnaşyklary ösdürmek üçin amatly şertleri döredýändigini nygtady.
Prezident Serdar Berdimuhamedow Russiýa Federasiýasy bilen strategik hyzmatdaşlygyň ösdürilmeginiň Türkmenistanyň daşary syýasatynyň ileri tutulýan ugurlarynyň biri bolup durýandygyny belledi. Aşgabat bilen Moskwanyň arasyndaky däp bolan gatnaşyklar ozaldan gelýän dostluga, ynanyşmaga, özara düşünişmäge esaslanýar.
Prezident Wladimir Putiniň belleýşi ýaly, “dostluk we hoşniýetli goňşuçylyk ruhunda üstünlikli ösýän” we barha diwersifikasiýalaşdyrylýan söwda-ykdysady gatnaşyklaryň ösüşi gün tertibinde aýratyn orun eýeledi.
Döwlet Baştutanlary şeýle hem syýasy ulgamdaky ynanyşmak häsiýetine eýe bolan özaragatnaşyklara we halkara meýdançalardaky netijeli bilelikdäki işlere ýokary baha berdiler.
Medeni-ynsanperwer ulgamy döwletara hyzmatdaşlygynyň möhüm bölegi hökmünde kesgitlenildi. Taraplar ylym, bilim, saglygy goraýyş we medeniýet ulgamlarynda hyzmatdaşlyklara uly üns berip, iki ýurduň halklarynyň bähbidi üçin bu gatnaşyklary has-da çuňlaşdyrmagyň zerurdygyny nygtadylar.
Duşuşygyň ahyrynda Türkmenistanyň Baştutany Russiýa Federasiýasy bilen mundan beýläk-de hemmetaraplaýyn we köpugurly hyzmatdaşlyga taýýardygyny tassyklady we türkmen-rus gatnaşyklarynyň mundan beýläk-de pugtalanjakdygyna ynam bildirdi. Öz gezeginde, Prezident Wladimir Putin, deslapky ylalaşyklara laýyklykda, dialogy dowam etdirmek üçin şu aýyň ahyrynda Türkmenistanyň Prezidente Sankt-Peterburgda garaşýandygyny mälim etdi.
