Serdar Berdimuhamedow Kataryň Ilçisinden ynanç hatyny kabul etdi
18-nji noýabrda Türkmenistanyň Prezidenti Serdar Berdimuhamedow Katar Döwletiniň Türkmenistanda täze bellenen Adatdan daşary we Doly ygtyýarly ilçisi Nasser bin Ahmed Al Taherden ynanç hatyny kabul etdi.
Döwlet Baştutany ilçini diplomatik wezipä bellenilmegi bilen gutlady hem-de Aşgabadyň Katar bilen köpugurly hyzmatdaşlygy pugtalandyrmaga we giňeltmäge strategik ähmiýet berýändigini nygtady. Bellenilişi ýaly, ýurtlaryň arasyndaky däp bolan dost-doganlyk gatnaşyklarynyň ýokary derejeli özara düşünişmek bilen häsiýetlendirilýändigi we netijeli hyzmatdaşlygyň ýokary derejede özara saparlar arkaly yzygiderli ösdürilýändigi bellenildi.
Prezident Serdar Berdimuhamedow döwletara hyzmatdaşlygynyň, şol sanda Birleşen Milletler Guramasynyň çäklerinde gazanylan üstünlikleri kanagatlanma bilen belledi. Türkmenistanyň BMG-de öňe sürýän başlangyçlaryny ilkinjileriň biri bolup goldaýandygy üçin katar tarapynyň goldawy aýratyn nygtaldy we ýokary baha berildi.
Duşuşygyň dowamynda iki tarap hem söwda-ykdysady gatnaşyklaryň mundan beýläk-de ösdürilmegi üçin ähli mümkinçilikleriň bardygyny tassykladylar.
Ýangyç-energetika toplumy, söwda, maýa goýum, ulag-aragatnaşyk, himiýa senagaty, dokma we oba hojalyk pudagy, saglygy goraýyş, ýokary tehnologiýalar ulgamlary hyzmatdaşlygyň geljegi uly ugurlarynyň hatarynda görkezildi.
Döwlet Baştutany şeýle hem medeni-ynsanperwer ulgamda, şol sanda türkmen we katar halklarynyň baý taryhy-medeni mirasyny bilelikde öwrenmek üçin hem giň mümkinçilikleriň bardygyny belledi.
Bu mümkinçilikleri netijeli durmuşa geçirmek we döwletara hyzmatdaşlygyny täze derejä çykarmak üçin türkmen-katar hökümetara toparynyň işini işjeňleşdirmegiň zerurdygyna üns berildi.
Ilçi Nasser bin Ahmed Al Taheri Türkmenistanyň Prezidentini iki ýurduň arasyndaky däp bolan dostlukly gatnaşyklary mundan beýläk-de pugtalandyrmakda tagallalaryny gaýgyrmajakdygyna ynandyrdy.
ORIENT
