Russiýa Türkmenistana «sanly attaşesini» iberer
Russiýanyň Hökümetiniň Başlygynyň orunbasary – Hökümet Apparatynyň ýolbaşçysy Dmitriý Grigorenkonyň Türkmenistana amala aşyran iş saparynyň netijesinde, ýurdumyzyň çäginde rus maglumat tehnologiýalaryny ösdürmek maksady bilen «sanly attaşeni» bellemek barada ylalaşyk gazanyldy. Täze hünärmeniň 2025-nji ýylyň ahyryna çenli Aşgabada gelmegi meýilleşdirilýär.
Bu çäre Dmitriý Grigorenko bilen Türkmenistanyň Ministrler Kabinetiniň Başlygynyň orunbasary Mämmethan Çakyýewiň hem-de aragatnaşyk ministri Hajymyrat Hudaygulyýewiň arasynda geçirilen duşuşykda ylalaşdyldy. Duşuşykda taraplar anyk IT taslamalaryny we sanlylaşdyrmak ugrunda hyzmatdaşlygyň geljegini ara alyp maslahatlaşdylar.
Dmitriý Grigorenko, Aşgabatda ýörite hünärmeniň bellenilmegi «özara bähbitli tehnologik hyzmatdaşlygy berkitmegiň ynamly ädimi» bolup durýandygyny belledi. Bu barada Russiýanyň Hökümetiniň resmi saýtynda bellenilýär.
Onuň sözlerine görä, Russiýanyň IT pudagy durnukly ösüşi görkezýär, şeýle hem milli çözgütler — uly dil modelleri, gözleg ulgamlary, internet bazarlary (marketpleýsler) we wirusa garşy programmalary öz içine alýan önümler — ýokary eksport mümkinçiliklerine eýedir.
«Sanly attaşe» programma üpjünçiliginiň, radioelektron önümleriň we beýleki IT çözgütleriniň eksport şertnamalarynyň baglaşylmagyny hem-de ýerine ýetirilmegini goldamak wezipesini ýerine ýetirer. Häzirki wagtda şeýle hünärmenler Hytaý, Birleşen Arap Emirlikleri we Indoneziýa ýaly 19 ýurtda iş alyp barýarlar.
Saparyň çäginde Dmitriý Grigorenko Türkmenistanyň Telekommunikasiýalar we informatika institutynyň talyplary üçin sanlylaşdyrmagyň esasy wezipelerine we mümkinçiliklerine bagyşlanan umumy sapagy geçirdi.
Wise-premýer türkmen kärdeşlerine Russiýanyň IT we emeli aň ugry boýunça dünýä derejesindäki işgärleri taýýarlamak boýunça güýçlendirilen modelini tanyşdyrdy. Bu täze okuw maksatnamalarynyň esasy aýratynlygy – işewür düzümleriň we senagat hyzmatdaşlarynyň işjeň gatnaşmagydyr: olar öz işgärlerini mugallym hökmünde iberýärler, hakyky iş tejribelerini (business-case) okuw meýilnamasyna goşýarlar we tejribe saparlaryny guraýarlar. Şeýle hem, bu öňdebaryjy bilim maksatnamalaryna Russiýanyň ýokary okuw mekdeplerinde okaýan daşary ýurtly talyplaryň hem gatnaşyp biljekdigi bellenildi.
ORIENT
