Ählumumy tehnologiýalar: Türkmenistanyň wekiliýeti Ýaponiýadaky STS forumyna gatnaşdy
5-nji oktýabrda Türkmenistanyň Oguz han adyndaky Inžener-tehnologiýalar uniwersitetiniň wekiliýeti Ýaponiýanyň Kioto şäherinde geçirilen «Ylym we tehnologiýalar jemgyýetde» atly forumyň (STS Forum) açylyş dabarasyna gatnaşdy. Bu forum dünýäniň dürli künjeklerinden hökümet wekillerini, alymlary we senagat ýolbaşçylaryny birleşdirýän abraýly halkara meýdançalaryň biridir.
Olaryň Alyhezreti Ýaponiýanyň Imperatorynyň we Imperator zenanynyň gatnaşmagynda geçirilen dabaranyň ýokary derejede guralmagy ýurduň halkara hyzmatdaşlygyny ösdürmäge ygrarlydygyny nygtady.
Forumda çykyş edenler — şol sanda Ýaponiýanyň Premýer-ministri hem-de dünýäniň meşhur şahsyýetleri — halkara hyzmatdaşlygynyň, etiki innowasiýalaryň we ylmy maglumat alyşmagyň ähmiýetini bellediler.
Forumyň esasy temasy — ylym we tehnologiýalaryň dünýäde ýüze çykýan umumy meseleleri çözmekde we adamzadyň durnukly ösüşini üpjün etmedäki orny boldy.
Dabaradan soň ylmy syýasat, tehnologiýa innowasiýalary hem-de bilim we gözlegleriň geljegi boýunça ministrlik we bilermenler derejesinde maslahatlar geçirildi.
Türkmenistanyň wekiliýetiniň STS forumyna gatnaşmagy ýurdumyzyň dünýäniň öňdebaryjy ylym we bilim edaralary bilen hyzmatdaşlygy pugtalandyrmak ugrunda möhüm ädim boldy. Forum, halkara tejribesi bilen tanyşmak we ony Türkmenistanyň bilim hem-de tehnologik ulgamlarynda ornaşdyrmak üçin ajaýyp mümkinçilik döretdi.
Mundan ozal Oguz han adyndaky Inžener-tehnologiýalar uniwersitetiniň wekiliýetiniň Ýaponiýada suw arassalaýyş ulgamyndaky tejribe bilen tanyşandygy barada habar berlipdi.
ORIENT
