Beýik Britaniýada adatdan daşary ýagdaýlara taýýarlyk kampaniýasy alada we satyn alyşlaryň artmagyna sebäp boldy
Beýik Britaniýanyň ýaşaýjylary hökümetiň adatdan daşary ýagdaýlara taýýarlyk boýunça täze kampaniýasy bilen bagly aladalaryny bildirýärler. Kampaniýa başlanandan soň, gündelik zerur harytlara bolan isleg artdy, käbir alyjylar azyk önümlerini we suwy köp mukdarda satyn alyp başladylar.
Be Ready atly kampaniýa 22-nji oktýabrda başlandy. Häkimiýetler öý hojalyklaryny daşardan kömek bolmazdan 72 sagat ýaşamaga ýeterlik esasy zerur harytlaryň ätiýaçlygyny döretmäge çagyrdylar. Bu başlangyç howpsuzlyk bilen bagly aladalaryň güýçlenýän döwründe öňe sürüldi.
Kampaniýa yglan edilenden soň, käbir ýaşaýjylar gündelik harytlaryň üpjünçiliginde bökdençlikleriň ýüze çykmagyndan howatyrlanýandyklaryny aýtdylar.
Şol bir wagtyň özünde, ähli maşgalalaryň öňünden zerur ätiýaçlyklary satyn almaga maliýe mümkinçiligi ýok. Azyk kömegini berýän haýyr-sahawat guramasynyň wekili köp sanly pes girdejili maşgalalaryň we ýekelikde ýaşaýan garry adamlaryň azyk kömegine her hepde mätäç bolýandygyny, şonuň üçin harytlary öňünden köp mukdarda satyn alyp bilmeýändiklerini belledi.
Köpçülikleýin habar beriş serişdeleriniň maglumatlaryna görä, kampaniýa başlanandan soň adatdan daşary ýagdaýlar üçin niýetlenen harytlaryň satuwy ep-esli artdy. Bölek satuw kompaniýalarynyň biri radio kabul edijileriň hepdelik satuwynyň 160 göterim ýokarlanandygyny habar berdi. Beýleki bir kompaniýada el çyralarynyň satuwy 284 göterim, radio kabul edijileriňki 92 göterim, daşarky batareýalaryňky bolsa 106 göterim artdy.
Käbir ýaşaýjylar howsala düşmezlige we harytlary köpçülikleýin satyn almakdan saklanmaga çagyrýarlar. Olaryň bellemegine görä, sosial ulgamlarda ýaýradylýan maglumatlaryň hemmesiniň dogrulygyny anyklamak aňsat däl. Beýleki ýaşaýjylar bolsa supermarketlerde konserwirlenen tuna balygy we çüýşeli suw ýaly önümleriň tekjeleriniň boşap başlamagyndan alada bildirýärler.
CCTV+ habar bermegine görä, kampaniýa Beýik Britaniýanyň ýaşaýjylarynyň arasynda dürli garaýyşlary döretdi: käbirleri öňünden taýýarlyk görmegiň zerurdygyny nygtaýan bolsa, beýlekiler munuň bilen bagly maliýe kynçylyklaryna we howsala bilen haryt satyn almak töwekgelçiligine ünsi çekýärler.
