Zer Design öňdebaryjy web-dizaýn üçin Awwwards halkara baýragyna dalaşgär boldy
Türkmenistanyň Zer Design döredijilik agentligi (“Zer dizaýn” HK) ýerli içgi öndüriji kompaniýasy bolan Archalyk kompaniýasynyň Archalyk.com web-saýtyny işläp taýýarlandygy üçin Site of the Day ugrundan abraýly Awwwards halkara baýragyny almak ugrunda dalaşgär boldy.
Ýeňiji bolan ýagdaýynda Archalyk.com saýty Site of the Month we Site of the Year ýaly has abraýly baýraklaryň gysgaça sanawyna giriziler. Olar bolsa bütin dünýäniň iň gowy dijital-çözgütleri üçin gowşurylýar.
Archalyk.com saýty brendiň eksport mümkinçiliklerini güýçlendirmek we onuň filosofiýasyny açyp görkezmek maksady bilen döredildi. Taslama häzirki zaman wizual utgaşygyny, adaptiw interfeýsi we animasion elementleri birleşdirip, ulanyjy bilen özara gatnaşygyň amatlylygyny üpjün edýär. Bu aýratynlyklar Awwwards halkara bileleşigi tarapyndan tapawutlandyryldy we dalaşgär bolmak üçin esas döretdi.
Zer Design agentligi web-dizaýna, brendinge, sanly marketinge we dijital-önümleriň önümçiligine ýöriteleşen. Onuň döreden önümleriniň hatarynda gaplama, wizual şahsylaşdyrma we ulanyjy tejribesi boýunça taslamalar bar. Döredijilik toparyna dizaýnerler, strategler, animatorlar we işläp taýýarlaýjylar girip, olar wizual taýdan täsirli we manyly çözgütleri döretmek bilen meşgullanýarlar.
Awwwards halkara baýragyna belli bir ugurdan dalaşgär bolmak ses berilşigi we halkara eminler toparynyň bahalandyrmagyny göz öňünde tutýar. Ýeňiji bolan ýagdaýynda bu taslama ýene bir gezek ykrar edilip, bu hem bütin dünýäniň öňdebaryjy brendleriniň ünsüni çekmäge mümkinçilik berer.
Awwwards bu döredijilik, ulanyş amatlylygy, innowasiýalar we wizual utgaşdyrma üçin öňdebaryjy sanly taslamalary aýratyn tapawutlandyrýan global meýdançadyr. Oňa dalaşgärleriň sanawyna girizilmek bolsa ýokary hünär we dizaýn hiliniň halkara ykrarnamasy bolup durýar.
Giňişleýin maglumatlar – agentligiň saýtynda: zer.design.
ORIENT
