Pekinde Türkmenistanyň Mejlisiniň we Halk wekilleriniň Ählihytaý ýygnagynyň hemişelik komitetiniň başlyklarynyň arasynda gepleşikler geçirildi
Penşenbe güni Pekinde Türkmenistanyň Mejlisiniň Başlygy Dünýägözel Gulmanowa Halk wekilleriniň Ählihytaý ýygnagynyň hemişelik komitetiniň Başlygy Çžao Leszin bilen gepleşikleri geçirdi.
Çžao Leszi 2023-nji ýylyň ýanwar aýynda HHR-iň Başlygy Si Szinpin bilen Türkmenistanyň Prezidenti Serdar Berdimuhamedowyň ikitaraplaýyn gatnaşyklaryň derejesiniň hemmetaraplaýyn strategiki hyzmatdaşlyga çenli ýokarlanandygyny bilelikde yglan edendigini belledi diýip, “Sinhua” habar berýär.
Şol ýylyň oktýabr aýynda Başlyk Si Szinpin Türkmenistanyň Halk Maslahatynyň Başlygy Gurbanguly Berdimuhamedow bilen halkara hyzmatdaşlygyň çäginde “Bir guşak, bir ýol” üçünji forumyna gatnaşmak üçin Hytaýa amala saparyň çäginde dostlukly pikir alyşmalar geçirdi. Iki ýurduň liderleri dürli ugurlarda döwletara hyzmatdaşlygy ösdürmek üçin täze meýilnamany beýan etdiler.
Halk wekilleriniň Ählihytaý ýygnagynyň hemişelik komitetiniň Başlygynyň belleýşi ýaly, Hytaý, “Guşak we ýol” başlangyjy bilen “Beýik Ýüpek ýoluny dikletmek” strategiýasy bilen deňleşmegi çaltlaşdyrmak, aragatnaşyk we oba hojalygy ýaly ugurlarda hyzmatdaşlygy çuňlaşdyrmak hem-de medeniýet, syýahatçylyk we bilim ýaly ugurlarda hyzmatdaşlygy giňeltmek üçin Türkmenistan bilen işleşmäge taýýardyr.
Çžao Leszi Hytaýyň we Türkmenistanyň kanun çykaryjy edaralarynyň elmydama dostlukly aragatnaşyk saklaýandyklaryny belledi. Onuň sözlerine görä, Halk wekilleriniň Ählihytaý ýygnagynyň Türkmenistanyň Mejlisi bilen bilelikde dürli derejedäki kanun çykaryjy edaralaryň arasyndaky dostlukly alyş-çalyşlary güýçlendirmek, kanun çykaryjylyk, gözegçilik we jemgyýetçilik dolandyryş meselelerinde tejribe alyşmagy çuňlaşdyrmaga hem-de iki ýurduň arasynda amaly hyzmatdaşlyk üçin amatly hukuk gurşawyny döretmäge taýýardyr.
Dünýägözel Gulmanowa öz tarapyndan, iki döwletiň liderleriniň strategiki ýolbaşçylygynda türkmen-hytaý strategiki hyzmatdaşlygyň ähli ugurlar boýunça ýagny syýasat, ykdysadyýet, diplomatiýa we medeni-ynsanperwer alyş-çalyş ýaly dürli ugurlarda çalt ösüş gazanandygyny belledi.
Türkmenistanyň Mejlisi Halk wekilleriniň Ählihytaý ýygnagy bilen dostlukly gatnaşyklary çuňlaşdyrmaga, degişli komitetleriň, şeýle hem ýaşlaryň we zenan deputatlaryň we wekilleriniň arasyndaky alyş-çalyşlary güýçlendirmegi maksat edirýär diýip, Gulmanowa sözüniň üstüni ýetirdi.
ORIENT
