Täze şahadatnama düzgüni Türkmenistanda sport hyzmatlarynyň hilini ýokarlandyrar
Fewral aýynda Türkmenistanyň Adalat ministrligi tarapyndan Bedenterbiýe we sport baradaky döwlet komitetiniň hem-de «Türkmenstandartlary» baş döwlet gullugynyň ýolbaşçylarynyň bilelikdäki buýrugy hasaba alyndy. Bu resminama, bedenterbiýe we sport ulgamynda hyzmatlaryň şahadatnamalaşdyrylmagynyň täze tertibini tassyklaýar. Resminama ýurdumyzdaky ähli sport hyzmatlarynyň şahadatnama düzgünini kesgitleýär we raýatlaryň howpsuzlygyny üpjün etmegi, hödürlenýän hyzmatlaryň hiline gözegçilik etmegi hem-de sarp edijileri pes hilli hyzmatlardan goramagy maksat edinýär.
Täze tertibe laýyklykda, bedenterbiýe we sport ulgamynda hyzmat berýän ähli ýuridik we fiziki şahslar laýyklyk şahadatnamasyny almaga borçlydyr. Şahadatnamalaşdyrmak işini, «Türkmenstandartlary» tarapyndan döwlet akkreditasiýasyndan geçen, Bedenterbiýe we sport baradaky döwlet komitetiniň Sport çärelerini geçirmek we utgaşdyrmak Guramasy ýerine ýetirýär.
Sport desgalary boýunça tehniki enjamlaşdyrylyş, howpsuzlyk, sanitariýa-epidemiologiýa talaplary hem-de ýangyn howpsuzlygy bilen baglanyşykly berk kadalar kesgitlenýär. Mundan başga-da, bu ugurda hyzmatlary hödürleýän taraplara degişli hünär talaplary girizilýär. Sport guramalary Bedenterbiýe we sport baradaky döwlet komiteti tarapyndan tassyklanan talaplara laýyk gelýän ýokary derejeli hünärmenlere eýe bolmalydyr.
Laýyklyk şahadatnamasy üç ýyla çenli möhlet bilen berilýär. Şahadatnamasy bolan hyzmatlar her ýyl bellenilen talaplara laýyklygy gözden geçirilýär. Şahadatnamasyz hyzmatlary hödürlemek Türkmenistanyň kanunçylygyna laýyklykda jogapkärçilige çekiler.
Sport toplumlarynyň, fitnes merkezleriniň we beýleki sport hyzmatlaryny hödürleýjileriň täze düzgünler bilen öňünden tanyşmagy we öz işlerini olara laýyk getirmegi maslahat berilýär.
ORIENT
