Türkmenistanyň we ABŞ-nyň bilim edaralary şäher taslamasynda ýer bölekleriň ulanylyşy barada maslahatlaşdylar
Türkmen döwlet binagärlik-gurluşyk instituty hem-de Kent döwlet uniwersiteti (ABŞ) “Dykyzlygy hasaba almak bilen taslamalaşdyrmak: goşmaça ýaşaýyş jaýlar barada gürrüň” atly mowzuk bilen onlaýn-maslahatyny geçirdiler. Duşuşyk Türkmen döwlet binagärlik-gurluşyk institutynyň hem-de Kent döwlet uniwersitetiniň (ABŞ) arasyndaky Özara düşünişmek hakyndaky ähtnamany durmuşa geçirmegiň çäklerinde geçirildi.
Maslahatyň dowamynda Çuýahoga etrabynyň Taslamalaşdyrmak departamentinden Patrik Hýuitt we Reýçel Nowak, Kliwlend-Haýts şäheriniň taslamalaşdyrmak we ösüş boýunça direktory Erik Zumft hem-de OnyxCreative kompaniýasynyň uly arhitektory Tommi Çesnes binagärlik, gurluşyk we dizaýn babatda öz tejribeleri barada gürrüň berdiler.
Gatnaşyjylar şäher taslamasynda ýer bölekleriň ulanylyşy, ýaşaýyş jaýyň dogry taslamalaşdyrylmagy, şäher taslamasyna ilat sanynyň, durmuş we ykdysady meseleleriň täsiri, şeýle hem ekologiýa meseleleri barada maslahatlaşdylar.
Bu geňeşmeler ilatyň zerurlyklaryna doly laýyk gelýän taslamalary durmuşa geçirmekde tejribe alyşmak üçin giň mümkinçilikleri berer.
ORIENT
