Türkmenistanyň Halk Maslahatynyň Başlygy “Buig-Türkmen” kompaniýasynyň baş direktory bilen duşuşdy
14-nji dekabrda Türkmenistanyň Halk Maslahatynyň Başlygy Gurbanguly Berdimuhamedow “Buig-Türkmen” fransuz kompaniýasynyň baş direktory Alekseý Reşow bilen duşuşyk geçirdi. Duşuşykda hyzmatdaşlygyň häzirki ýagdaýy we ony ösdürmegiň geljekki ugurlary ara alnyp maslahatlaşyldy. Bu barada Türkmenistanyň Döwlet teleradio ýaýlymynyň habarlar gepleşiginde habar berildi.
Türkmen halkynyň Milli Lideri “Buig-Türkmen” kompaniýasynyň ýurtda köp ýyllaryň dowamynda netijeli iş alyp barýandygyny, hem-de özüni ygtybarly hyzmatdaş hökmünde görkezendigini belledi. Öz gezeginde Alekseý Reşow Türkmenistanyň Halk Maslahatynyň Başlygyna häzirki döwürde wekilçilik edýän kompaniýasynyň ýerine ýetirýän gurluşyk taslamalary habar berdi we Türkmenistanda geljekde alnyp barmaly işleriniň meýilnamasy paýlaşdy.
Gurbanguly Berdimuhamedow bina edilýän önümçilik we durmuş maksatly desgalarynyň gurluşygynda ýokary hil derejesiniň üpjün edilmeginiň, şeýle hem bellenilen möhletlerde ulanmaga berilmeginiň zerurdygyny nygtady. Şeýle hem, gurluşyk işlerinde milli binagärlik ýörelgeleri bilen häzirki zamanyň ösen tejribesiniň utgaşdyrylmalydygyny belledi.
Duşuşygyň ahyrynda Türkmenistanyň Halk Maslahatynyň Başlygy myhmana kesgitlenen wezipeleri ýerine ýetirmekde üstünlik arzuw etdi we netijeli hyzmatdaşlygyň dowam etdiriljekdigine ynam bildirdi.
ORIENT
