Türkmenistan dünýä energetika bazaryndaky ornuny güýçlendirýär: täze eksport ugurlary
“Türkmenistanyň nebiti we gazy – 2024” atly halkara maslahatynyň çäginde “Türkmengaz” DK başlygynyň orunbasary Myrat Arçaýew tebigy gaz pudagynda möhüm başlangyçlar we gaznylan netijiler bilen tanyşdyrdy. Ol “Türkmen tebigy gazynyň geljegi: täze eksport ýollary we eksport mümkinçilikleri” atly mejlisinde çykyş etdi.
Arçaýew dünýäde ikinji orunda durýan we ýurt üçin strategiki çeşme bolan “Galkynyş” gaz käniniň ähmiýetini belläp geçdi. Ol Halkara Energetika Agentliginiň çaklamalaryna görä 2030-njy ýyla çenli 20%, 2040-njy ýyla çenli 30% tebigy gaza bolan islegiň ýokarlanjakdygyna ünsi çekdi.
“Türkmengaz” DK başlygynyň orunbasary “Galkynyş” gaz känini özleşdirmek we eksport mümkinçiligini ýokarlandyrmak üçin iň uly nebit-gaz kompaniýalary bilen hyzmatdaşlyk etmek üçin meýilnamalary barada habar berdi. Arçaýew, 2024-nji ýylyň 1-nji martynda “Türkmengaz” döwlet konserni bilen Türkiýe Respublikasynyň energetika we tebigy serişdeler ministrliginiň arasynda özara hyzmatdaşlyk etmek boýunça gol çekilen Ylalaşygyň Türkiýäni tebigy gaz bilen üpjün etmegi we onuň üsti bilen dünýä bazaryna çykarmaga gönükdirlendigini ýada saldy.
2024-nji ýylyň 28-nji awgustynda “Türkmengaz” döwlet konserni bilen Eýranyň Milli gaz kompaniýasynyň arasynda gol çekişilen Ylalaşygyň esasy maksady, türkmen tebigy gazyny ugratmak ugrundaky hyzmatdaşlygy giňeltmekden ybaratdyr.
Gol çekilen resminamalara laýyklykda türkmen tebigy gazynyň diwersifikasiýa ýoly bilen eksportyny artdyrmak meýilleşdirilýär. Eýran Yslam Respublikasyna 40 milliard kub metr tebigy gaz bermek we “SWAP” usuly boýunça Yrak Respublikasyna, şeýle hem günorta tarap Türkiýe Respublikasyna we üstaşyr Ýewropa ýurtlaryna ibermek meýilleşdirilýär.
Arçaýew, şeýle hem, Türkmenistan, Owganystan, Päkistan we Hindistany birleşdirýän TOPH (TAPI) taslamasynyň bir bölegi boljak Serhetabat-Hyrat gaz geçirijisiniň işe girizilendigini habar berdi. Bu taslama sebitiň ykdysady ösüşine goşant goşar we iş ýerleri döreder. Ondan öň Türkmenistanyň çäginden geçýän gaz geçirijisiniň 214 kilometrlik böleginiň gurluşygy tamamlandy.
Mundan başga-da, metanyň zyňyndylaryny azaltmak we gaýtadan dikeldilýän energiýa çeşmelerini ösdürmek ýaly ekologik standartlaryny göz öňünde tutup, ýurduň nebit-gaz toplumyny döwrebaplaşdyrmak meýilleri beýan edildi.
“Türkmengaz” döwlet konserniniň başlygynyň orunbasary halkara kompaniýalary we maliýe guramalaryny Türkmenistanda täze gaz taslamalarynyň durmuşa geçirilmegine gatnaşmaga çagyrdy we maýadarlar üçin ygtybarly kanuny taýdan goraglylygy belläp geçdi.
ORIENT news
