«Arkadag» futbol kluby AFK-nyň Çagyryş ligasyna taýýarlyk geçmäge Dubaý şäherine bardy
Türkmenistanyň iki gezek çempiony Arkadag” futbol kluby ilkinji gezek gatnaşjak halkara ýaryşa – 2024/25 möwsüminiň AFK-nyň Çagyryşlar Ligasyna (AFC Challenge League) taýýarlyk geçmäge başlady.
18-nji oktýabrda, anna güni Wladimir Baýramowyň ýolbaşçylygyndaky topar BAE-niň Dubaý şäherine baryp, ol ýerde okuw-türgenleşik ýygnanyşyklara başlady.
Şol günüň özünde “Arkadag” ýeňil, dikeldiş görnüşinde ilkinji türgenleşigini geçirdi.
Dubaýda 21-nji oktýabra çenli dowam etjek taýýarlyk ýygnanyşyklaryň çäklerinde “Arkadag” topary BAE-niň birinji diwizionynda çykyş edýän “Al-Hamriýa” klubyna garşy ýoldaşlyk duşuşygyny meýilleşdirdi. 20-nji oktýabrda geçiriljek bu duşuşyk klubyň AFK-nyň Çagyryş ligasynyň toparça tapgyrynyň başynda taýýarlyk basgançagy bolar.
Dubaýda ýygnanyşyklar tamamlanandan soňra, “Arkadag” futbol kluby Küweýtiň El-Küweýt şäherine ugrap, Çagyryş ligasynda öz çykyşyna başlar.
Bije çekilişigiň netijesinde “Arkadag” Günbatar zolagynyň “B” toparçasyna düşüp, “Al-Arabi” küweýtli kluby, “Maziýa Sports end Rekrieýşn” maldiwly kluby hem-de “Abdyş-Ata” gyrgyz kluby onuň garşydaşlary boldy. Toparça tapgyrynyň duşuşyklary Küweýtde 26-njy oktýabr – 2-nji noýabr aralygynda merkezleşdirilen formatda geçiriler.
Ýaryşa 18 topar gatnaşyp, olar iki zolaga, ýagny Günbatar we Gündogar zolaklaryna bölünen. Çärýek finala sekiz topar çykar: toparçalaryň üç ýeňijileri hem-de Günbatar zolagyndaky ikinji ýerleriň arasyndaky iň gowy toparlar hem-de Gündogar zolagynyň her toparçasynyň iki iň gowy toparlary.
Pleý-off iki duşuşyk görnüşinde (öýde we myhmançylykda) geçiriler. Çärýek finallar 2025-nji ýylyň 5-13-nji marty aralygynda, ýarym finallar – 9-17-nji aprel aralygynda geçirilip, final duşuşygy bolsa 2025-nji ýylyň 10-njy maýyna meýilleşdirilen.
ORIENT news
