Türkmen mugallymlary wirtual we giňeldilen hakykat esasyndaky işläp taýýarlamalaryna gyzyklanma bildirýärler
Ylmy iş boýunça hyzmatdaşlygy ýola goýmak maksady bilen Türkmenistanyň telekommunikasiýa we informatika institutynyň mugallymlary akademik M.F.Reşetnýow adyndaky Sibiriň ylym we tehniologiýalar döwlet uniwersitetine baryp gördüler.
Iş saparynyň çäginde hyzmatdaşlygy mundan beýläk-de ösdürmek meseleleri ara alnyp maslahatlaşyldy diýip, Türkmenistanyň Bilim ministrliginiň saýtynda habar berilýär.
Nanohemra diýlip atlandyrylýan kiçi älem enjamlaryny oýlap tapmak boýunça işler hem-de VR (wirtual hakykat) we AR (üsti ýetirilen hakykat) tehnologiýalar arkaly barlaghana işleriniň wirtuallaşdyrma usullary türkmen hünärmenleriniň aýratyn ünsüni çekdi.
Hemra aragatnaşygynyň we älem enjamlarynyň öwrenilmegi Türkmenistanyň telekommunikasiýa we informatika institutynyň ylmy-barlag işiniň esasy ugurlarynyň biridir.
Munuň bilen baglylykda, bu hemralaryň taslama we programmirleme işiniň ähli tapgyrlary, olary goýberilişiň we olara gözegçilik etmegiň aýratynlyklary, şeýle-de elektronikanyň öte gyzmagyna garşy göreşiň netijeli usullary jikme-jik öwrenildi. Türkmenistanly wekiller Maglumat-kommunikasiýa bilim tehnologiýalaryny dolandyrmak boýunça Merkezine baryp gördüler. Ol ýerde ýaş mugallymlar we hünärmenler wirtual we giňeldilen hakykaty ulanmagyň hasabyna okatmagyň netijeliligini ýokarlandyrmak usullaryny öwrenýärler.
Maglumat-kommunikasiýa bilim tehnologiýalaryny dolandyrmak boýunça Merkeziniň wekilleri bilen geçirilen duşuşygyň dowamynda türkmen ýokary okuw mekdebiniň mugallymlaryna giňeldilen hakykat tehnologiýalarynyň esasynda döredilen ýörite programma üpjünçiligi görkezildi. Mysal üçin, wirtual barlaghana, onda talyp hemrany ýasap, onuň taslamasynyň her tapgyryny öwrenip biler. Munuň ýaly wirtual barlaghana Türkmenistanyň telekommunikasiýa we informatika institutynyň talyplary tarapyndan hem işläp taýýarlandy.
ORIENT news
