Arkadag şäherinde ÝUNESKO-nyň şahadatnamasynyň gowşurylyş dabarasy geçirildi
Arkadag şäheriniň Aba Annaýew adyndaky Halkara atçylyk akademiýasynda “Ahalteke atçylyk sungaty we atlary bezemek däpleri” milli hödürnamanyň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilendigi baradaky şahadatnamanyň gowşurylyş dabarasy geçirildi.
Dabarada ÝUNESKO-nyň Baş konferensiýasynyň başlygy Simona-Mirela Mikulesku çykyş etdi. Ol Türkmenistanyň ýolbaşçylaryny we tutuş türkmen halkyny şanly waka bilen gutlap, şahadatnamany dabaraly ýagdaýda gowşurdy diýip, “TDH” habar berýär.
Dabara gatnaşyjylar Akademiýanyň binýadynda döredilen “Ahalteke atlary – parahatçylygyň ilçileri” atly ÝUNESKO klubyna baryp gördüler hem-de Arkadag şäheriniň Görogly adyndaky döwlet atçylyk sirkinde “Galkynyş” milli at üstündäki oýunlar toparynyň çykyşlaryna tomaşa etdiler.
Ahalteke atçylyk sungatyny hem-de behişdi bedewleri bezemek däpleriniň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizmek baradaky Karary 2023-nji ýylyň dekabrynda Kasane şäherinde (Botswana Respublikasy) geçirilen Hökümetara komitetiniň 18-nji mejlisinde kabul edildi.
ORIENT news
