Bilim ulgamyny kämilleşdirmekde türkmen-koreý hyzmatdaşlygy ösdürilýär
Anna güni, 6-njy sentýabrda Türkmenistanyň Bilim ministrliginiň Innowasiýa maglumat merkezine Koreýa Respublikasynyň Türkmenistandaky Ilçihanasy tarapyndan koreý dili boýunça okuw kitaplarynyň gowşurylyş dabarasy geçirildi.
Innowasiýa maglumat merkeziniň direktory Çary Hanmuhammedow we merkeziň hünärmenleri Koreýa Respublikasynyň Türkmenistandaky Ilçihanasynyň wekillerini dabaraly garşyladylar. Dabara Koreýa Respublikasynyň Türkmenistandaky Adatdan daşary we Doly ygtyýarly Ilçisi jenap Ji Kýu-Tek we Ilçihananyň beýleki wekilleri gatnaşdylar.
2021-nji ýylyň 26-njy oktýabrynda Türkmenistanyň Bilim ministrliginiň Innowasiýa maglumat merkezi bilen Koreýa Respublikasynyň Milli maglumat agentligi bilen özara baglaşylan ylalaşyk esasynda Innowasiýa maglumat merkeziniň çäginde döredilen “Maglumat elýeterlilik merkezi” ynsanperwerlik ýörelgelerine esaslanyp, mümkinçiligi çäkli hem-de pensiýa ýaşyndaky raýatlar üçin kompýuter sowatlylygy boýunça okuwlary gurnaýar.
Koreý dili boýunça okuw kitaplary sowgat hökmünde gowşurylyş dabarasynyň dowamynda Merkez bilen Koreýa Respublikasynyň Türkmenistandaky Ilçihanasynyň bilim ulgamyna degişli ikitaraplaýyn hyzmatdaşlyk boýunça meseleler ara alnyp maslahatlaşyldy.
Dabaranyň dowamynda Innowasiýa maglumat merkezi tarapyndan myhmanlara ýadygärlik sowgatlar gowşuryldy.
ORIENT news
