“Kamaz” Türkmenistanda ýerli brend bilen tehnika önümçiligini ýola goýmagy teklip edýär
27-nji awgust, sişenbe güni Kazanda geçirilen Söwda-ykdysady, ylmy-tehniki we medeniýet hyzmatdaşlygy boýunça türkmen-tatar iş toparynyň bilelikdäki mejlisinde “Kamaz” Daşary söwda kompaniýasy paýdarlar jemgyýetiniň sebit direktory Marat Garifullin “Kamaz” kompaniýasynyň Türkmenistanda önümçiligi ýola goýmagy teklip edýändigi barada aýdyp geçdi.
Gürrüň Türkmenistanda (eýýäm “Kamaz” hyzmat ediş merkezleri hereket edýär) tehnika öndürmek üçin täze desganyň döredilmegi baradadyr. Garifulliniň aýtmagyna görä, munuň ýaly önümçiligi ýola goýmagyň dürli görnüşleri ara alnyp maslahatlaşylýar, üstesine-de tatar tarapy bu önümçiligi ýerli bredniň adyndan çykarmagy teklip edýär. Türkmenistanyň Maliýe we ykdysadyýet ministri Serdar Joraýew bu teklibi goldap, türkmen bazarynda “Kamaz” önümleriniň köpgörnüşliligini belläp, munuň bilen baglylykda Türkmenistanda onuň önümçiliginiň ýola goýulmagy we bilelikdäki kärhana görnüşinde hereket etmegi barada maslahatlaşylýandygy barada aýtdy.
Şeýle-de Garifullin 2024-nji ýylyň jemleri boýunça Türkmenistana hususy bölüm üçin niýetlenen “Kamaz”-yň 100 birlik tehnikasynyň getirilmegine garaşylýandygyny hem-de häzirki wagtda şertnamanyň üstünde işlenilip, onuň tehniki tarapy barada ylalaşmalaryň geçirilýändigini belledi.
Söwda-ykdysady, ylmy-tehniki we medeniýet hyzmatdaşlygy boýunça türkmen-tatar iş toparynyň bilelikdäki 9-njy mejlisi sişenbe güni Kazanda mejlisiň başlyklary – Türkmenistanyň Maliýe we ykdysady ministri Serdar Joraýewiň we Tatarystan Respublikasynyň Senagat we söwda ministri, premýer-ministriň orunbasary Oleg Korobçenkonyň ýolbaşçylygynda geçirildi. Taraplar gün tertibinde duran hyzmatdaşlygyň söwda-ykdysady, nebit-gaz we senagat pudagyndaky, aragatnaşyk we maglumat tehnologiýalar, oba hojalyk we daşky gurşawy goramak, ylym we bilim, lukmançylyk ugurlary, medeniýet, syýahatçylyk, sport we ýaşlar syýasaty ýaly pudaklar boýunça meseleleri ara alyp maslahatlaşdylar.
Ahyrynda bolsa taraplar Söwda-ykdysady, ylmy-tehniki we medeniýet hyzmatdaşlygy boýunça türkmen-tatar iş toparynyň bilelikdäki 10-njy mejlisini 2025-nji ýylda Aşgabat şäherinde geçirmegi barada şertlendiler.
ORIENT news
