“Dragon Oil” kompaniýasynyň guramagynda Balkanda küşt ýaryşy geçirildi
Balkan welaýatynyň iň uly küşt ýaryşy 23-25-nji awgust aralygynda Hazar (Çeleken) şäherinde geçirildi. Çagalardan, zenanlardaň we ýönekeý küşt muşdaklaryndan ybarat 32 gatnaşyjyny jemlän açyk ýaryş Türkmenistanyň Küşt federasiýasynyň ýardamy bilen “Dragon Oil” (BAE) kompaniýasy tarapyndan gurnaldy.
Ýaryşyň ýeňijisi sportuň at gazanan ussadyna dalaşgär Şahruh Turaýew (Daşoguz) bolup, mümkin bolan 7 utukdan 7 utuk gazanmagy başardy. 5,5 utukdan gazanyp, 2-nji we 3-nji ýere mekdep okuwçylary Dawut Meredow (Aşgabat) we Serdar Käbehanow (Mary) mynasyp boldular. Ýeňijilere, ýaş gatnaşyjylara we gözel zenan-gyzlara “Dragon Oil” kompaniýasynyň adyndan gymmatbahaly sowgatlar gowşuryldy.
Ýerli gatnaşyjylaryň haýyşy boýunça ýaryşyň ýeňijisi Şahruh Turaýew bilelikdäki oýun tapgyryny geçirip, bellenen wagtda bäş bäsdeş bilen bilelikde oýnady. Milli aýal-gyzlaryň ýygyndysynyň tälimçisi 0,5-e 4,5 utuk bilen ýeňmegi başardy. Emma bu ýagdaý ussat bilen oýnamak mümkinçiligi seýrek bolan gadymy oýnuň ýerli muşdaklarynyň höweslerini bozmady.
Ýaryşyň baş araçysy hökmünde öz wagtynda balkanly küşt mekdebiniň okuwçysy bolan “Küşt Älemi” Türkmenistanyň ilkinji ýokary hünär küşt akademiýasynyň direktory Gurbangeldi Amangeldiýew çykyş etdi.
Ýaryşyň dowamynda ol mümkin bolan ýerli küşt tälimçileri bilen söhbetdeşlik geçirdi. “Dragon Oil” kompaniýasynyň, “Küşt Älemi” akademiýasynyň we Türkmenistanyň Küşt federasiýasynyň meýillerine laýyklykda Hazar deňizýaka şäherinde basym çagalar üçin küşt gurnagy hem açylmaly.
“Dragon Oil” kompaniýasynyň wekilleriniň aýtmagyna görä, bu küşt ýaryşy däbe öwrülip, hazarly muşdaklar bilen bilelikde ýurduň ökde küştçileri üçin ýylsaýyn geçirilmeli.
ORIENT news
