Türkmen ýaşlary “Algoritm” okuw merkezinde IT hünärlerini öwrenýärler
“Pähim-paýhas ummany-Magtumguly Pyragy” ýylynda beýik sepgitlere ýetýän Watanymyzda ylym-bilim günsaýyn gülläp ösýär. Elbetde, bu ösüşleriň sakasynda Hormatly Arkadagymyzyň we Hormatly Prezidentimiziň diýseň uly tagallalary bar. Sebäbi biziň Watanymyzda ýaş nesil baradaky alada mydama döwlet syýasatynyň ileri tutulýan möhüm ugurlarynyň biri bolup durýar. Bu ösüşlere Mary welaýatynyň Mary şäherinde ýerleşýän “Akylly hyzmat” hojalyk jemgyýetiniň “Algoritm” okuw merkezi hem öz uly goşandyny goşýär. “Algoritm” okuw merkezinde ýaşlara diňe bir kämil bilim bermek bilen çäklenilmän, eýsem, dürli önümçilik ugurlary üçin ýaş hünärmenleri taýýarlamak boýunça hem giň gerimli işler amala aşyrylýar.
Häzirki wagtda bolsa, hususy kärhanalaryň sargytlary esasynda ýörite proýektler düzülip, dürli maksatnamalar esasynda IT ulgamyny dolandyrmak, AutoCAD, grafika dizaýn, programmirleme, şahsy kompýuterleri sazlamak we abatlamak ýaly ugurlar hem-de kompýuter tehnologiýasynyň tehniki dilini iňlis dilinde öwretmek boýunça ýaş hünärmenleri taýýarlamak kurslary alnyp barylýar. Şeýle-de, proýekte gatnaşyjylar tejribelik işlerini Mary welaýatynyň bilim we saglyk ulgamynyň hem-de isleg bildirýän beýleki kärhanalaryň kompýuterlerini tölegsiz arassalap we abatlap bermek işlerini geçirmek bilen amala aşyrýarlar.
ORIENT news
