Aragatnaşyk pudagynyň hünärmenleri sanly ykdysadyýeti ösdürmegiň wajyp ugurlary barada söhbetdeşlik geçirdiler
Türkmenistanyň ösüşiniň berk binýady bolup hyzmat edýän sanly ykdysadyýeti yzygiderli kämilleşdirmek we bu işlere ýaşlary çekmek Hormatly Prezidentimiziň Serdar Berdimuhamedowyň öňe sürýän il bähbitli, ýurt ähmiýetli syýasatynyň biri bolup durýar.
Ýaşlaryň täze, has kämil tehnologiýalardan we öňdebaryjy tilsimatlardan başarjaň peýdalanmagyna şertler döredýän sanly ulgamy ösdürmäge uly üns berilýär.
Sebitiň ilkinji «akylly» şäheri bolan - Arkadag şäherinde sanly ulgamlary, programmalary we döwrebap çözgütleri gurnamak işlerine «Türkmenaragatnaşyk» agentliginiň ýaş hünärmenleriniň işjeň gatnaşdygy bellärliklidir.
Arkadag şäherinde geçirilen söhbetdeşlikde hem aragatnaşyk pudagynda zähmet çekýän ýaş hünärmenler sanly ykdysadyýeti ösdürmekde öňde duran wezipeler, maglumat-aragatnaşyk tehnologiýalaryny ulanmak arkaly ähli pudaklary özgertmek, has ýokary tizlikli Internet baglanyşygyny üpjün etmek we kiberhowpsuzlyk çärelerini kämilleşdirmek barada giňişleýin durup geçdiler.
Söhbetdeşligiň ahyrynda aragatnaşykçy ýaşlar yhlasly we tutanýerli zähmet çekip, Türkmenistanyň tehnologiýa ösüşlerine mynasyp goşantlaryny goşjakdyklaryna ynandyrdylar.
ORIENT news
