Ýokary derejeli türkmen wekiliýeti Ankarada TÜRKSOÝ-yň ştab-kwartirasyna baryp gördi
Wise-premýer, Daşary işler ministri Raşid Meredowyň ýolbaşçylygyndaky Türkmenistanyň wekiliýeti Türkiýe Respublikasyna amala aşyrýan iş saparynyň çäklerinde 13-nji awgustda, sişenbe güni Türki medeniýetiň halkara guramasynyň (TÜRKSOÝ) Baş sekretary Sultan Raýew bilen duşuşdy.
DIM-iň habarlar gullugynyň habar berşine görä, duşuşygyň dowamynda taraplar “Änew – türki dünýäsiniň medeni paýtagty” hem-de “Türki dünýäsiniň beýik şahyry we akyldary Magtymguly Pyragy ýyly” atly maksatnamalarynyň bilelikdäki çäreleri boýunça giňişleýin pikir alyşdylar.
TÜRKSOÝ, ÝUNESKO we beýleki halkara guramalarynyň çäklerinde Magtymgulynyň döredijiligini hem-de gadymy türkmen şäheri Änewiň medeni ähmiýetini dünýä ýaýmak duşuşygyň möhüm mowzugy boldy.
Hyzmatdaşlygyň häzirki ýagdaýyny we mümkinçiliklerini maslahatlaşyp, türki dilli halklaryň baý medeni mirasyny dünýä ýaýmak we öwrenmek babatynda Türkmenistanyň we TÜRKSOÝ-yň hyzmatdaşlygynyň netijeliligi barada hem bellenildi.
TÜRKSOÝ-yň ştab-kwartirasynda türkmen wekiliýetiniň agzalary beýik türkmen şahyry Magtymguly Pyragynyň doglan gününiň 300 ýyllygyna bagyşlanan surat eserleriniň we kitaplarynyň sergisi bilen tanyşdylar.
ORIENT news
