Türkmenistanyň we Özbegistanyň Prezidentleri ikitaraplaýyn hyzmatdaşlygy ara alyp maslahatlaşdylar
Türkmenistanyň Prezidenti Serdar Berdimuhamedow Astanada Merkezi Aziýa döwletleriniň VI Konsultatiw duşuşygyna gatnaşyp, ol ýerde Özbegistan Respublikasynyň Prezidenti Şawkat Mirziýoýew bilen duşuşdy.
TDH habarlar gullugynyň habar bermegine görä, Serdar Berdimuhamedow bu duşuşygy geçirmek baradaky teklibi hem-de Türkmenistan bilen Özbegistan Respublikasynyň arasyndaky gatnaşyklarynyň ösdürilmegine goşan uly şahsy goşandy üçin Şawkat Mirziýoýewe öz hoşallyk sözlerini bildirip, ýurtlarymyzyň arasyndaky hyzmatdaşlyk ykdyasy, söwda, ulag, medeni we beýleki möhüm ugurlary öz içine alýandygyny nygtady.
Özbegistanyň Respublikasynyň Prezidenti öz gezeginde, türkmen-özbek ykdysady hyzmatdaşlygynyň oba hojalyk, elektrik energiýa, nebit-gaz toplumy, himiýa senagaty we beýleki giň ugurlar boýunça işjeň ösüşini kanagatlanma bilen belläp, iki döwletiň çäginde Söwda öýleriniň döredilmeginiň we ykdysady forumlarynyň geçirilmeginiň möhümdigini aýratyn nygtady.
Ikitaraplaýyn hyzmatdaşlygyň beýkeki möhüm ugurlary barada aýdanda, Prezident Serdar Berdimuhamedow Merkezi Aziýanyň, Hytaýyň, Ýeropanyň, Ýakyn we Orta Gündogaryň bitewi ulag ulgamyny döretmekde Türkmenistanyň we Özbegistanyň tagallalaryny birleşdirmek üçin zerur mümkinçilikleriniň bardygy barada aýratyn belläp geçdi.
Bellenilşi ýaly, energetika pudagy boýunça hem netijeli hyzmatdaşlyk ýola goýuldy. Ýurtlarymyzyň arasyndaky ylalaşyklara laýyklykda, 2019-njy ýylyň dekabr aýyndan başlap Özbegistana türkmen elektrik energiýasynyň geçirilmegi amala aşyrylýar. Şeýle-de Türkmenistandan goňşy Özbegistana tebigy gaz hem geçirilýär.
Mundan başga-da iki tarap medeni we ynsanperwer ulgamlaryndaky ikitaraplaýyn gatnaşyklarynyň üstünlikli ösüşi barada hem hoşallyk bilen bellediler. Muňa bolsa türkmen edebiýatynyň dünýä belli nusgawy şahyry we Gündogaryň ynsanperwer akyldary Magtymguly Pyragynyň 300 ýyllyk ýubileýiniň giňden bellenilmegi şaýatlyk edýär.
ORIENT news
