“Roskosmos” Halkara kosmos stansiýasyna syýahatçylary iberer
“Roskosmos” döwlet korporasiýasynyň golçur kärhanasy “Glawkosmos” paýdarlar jemgyýeti Halkara kosmos stansiýasyna (HKS) dolandyrylýan täjirçilik uçuşlary üçin maksatnamasynyň başlandygyny habar berdi.
Bu maksatnama boýunça ilkinji syýahatçylyk uçuşy indiki ýylyň üçünji we dördünji çärýeklerinde meýilleşdirilýär. Aýry-aýry adamlar uçuşyň öň ýanyndaky doly kosmonawt tälimini alansoň, HKS-da 10 gün geçirmek üçin ajaýyp mümkinçilik alarlar.
Uçuşa gatnaşyjylaryň taýýarlygy takmynan 10 aý dowam eder, ýarysy Moskwa oblastynda ýerleşýän Ýyldyzlar şäherçesindäki Kosmonawt okuw merkezinde ýokary derejede taýýarlyk geçerler.
Taýýarlygyň maksatnamasy ilkinji lukmançylyk anyklamasy we basyş astynda synagdan geçirmek şeýle hem ähli zerur hünärler boýunça okuw sapaklaryny öz içine alýar. Okuwlar iňlis ýa-da rus dillerinde alnyp barylar.
Uçuş Gazagystanyň Baýkonur kosmodromyndan “Soýuz MS” kosmos gämisinde amala aşyrylar. Kosmos gämisinde syýahatçylar üçin iki ýer we professional kosmonawt üçin bir ýer göz öňünde tutulan.
Halkara kosmos stansiýasyna uçuş takmynan 3 sagat dowam eder. Uçuşa gatnaşyjylar meýilleşdirilen işleri ýerine ýetirip, surata we wideo düşürip, kosmosdan Ýeriň täsin görnüşlerinden lezzet alarlar. Yzyna gaýdyp gelensoň, Ýyldyzlar şäherçesinde bir hepdelik uçuşdan soňky reabilitasiýada bolarlar.
ORIENT news
