Türkiýäniñ «Ephesus Experience» muzeýi - dünýäniñ öňdebaryjy muzeýleriniň biri hökmünde ykrar edildi
ÝUNESKO-nyň Bütindünýä mirasynyň sanawyna girizilen Türkiýäniñ Efes sebitinde ýerleşýän Efes tejribe muzeýi, tehnologiýa, dizaýn we sergi ugurlary boýunça dünýäde iň abraýly baýraklaryň biri bolan Mondo-Dr Awards baýraklarynda ilkinji oruna mynasyp boldy.
Izmiriň Seljuk etrabynda ýerleşýän we Türkiýäniň Medeniýet we syýahatçylyk ministrliginiň garamagyndaky DEM Museology tarapyndan işläp taýýarlanan we dolandyrylýan «Ephesus Experience» tejribe muzeýi, iň gowy muzeý kategoriýasynda bäsdeşlerini yzda galdyryp, bütin dünýäde meşhurlyk gazanmagy başardy.
Muzeologiýa tejribesini taryhy kyssa bilen birleşdiren ilkinji muzeýleriň biri bolan Efes tejribe muzeýi, Türkiýäniň we daşary ýurtlaryň öňdebaryjy ylmy merkezleriniň we kompaniýalarynyň arhitektorlar, kuratorlar, dizaýnerler, suratkeşler, tehnologiýa hünärmenleri, taryhçylar we arheologlar topary tarapyndan döredildi.
Ol innowasion tehnologiýalar arkaly gadymy Efesiň gündelik durmuşy, binagärçiligi we sungaty barada tejribeleri başdan geçirmäge mümkinçilik berýär. Döwrebap enjamlaryň ornaşdyrylmagy bu ýere gelýänleri özüni wakalaryň jümmüşinde ýaly duýmaga mümkinçilik berýär.
Ellinçilik we Rim döwründe gülläp ösen iň uly port şäherlerinden biri bolan Efes 2015-nji ýylda ÝUNESKO-nyň Bütindünýä mirasynyň sanawyna girizildi.
Angliýada ýerleşýän Mondiale Publishing neşiri tarapyndan gurnalýan «Mondo-Dr Awards» baýraklary eýýäm ýedi ýyl bäri sergi we myhmanhanalar pudaklary boýunça abraýly taslamalary ykrar edýär. 12-nji iýunda Las Wegasda geçirilen bu ýylky dabara, meýdançalaryň tekniki enjamlaşdyrylyşyna, dizaýnyna we myhmanlarda galdyran täsirlerine bagyşlanyp geçirildi.
«Ephesus Experience» tejribe muzeýi jemleýji tapgyrda Riýaddaky Aramco VIP myhmanlar merkezi, Hindistandaky India in Fashion şeyle hem Parižda ýerleşýän Dome Des Invalides muzeýleri bilen bäsleşip, Mondo-Dr 2024 baýraklarynda birinji oruny eýeledi.
ORIENT news
