Aşgabatda Türkmenistan bilen Ýewropa Bileleşiginiň bilelikdäki maslahaty geçirildi
Bilim, howpsuzlyk, howanyň üýtgemegi, ulag we üstaşyr geçelgeleriniň ösüşi, energiýa, sanly ykdysadyýet, suw serişdeleri dolandyrmak we söwda - bu ugurlar Aşgabatda geçirilen ýubileý maslahatynda Türkmenistan bilen Ýewropa Bileleşiginiň arasyndaky gatnaşyklaryň ileri tutulýan ugurlarynyň hataryna goşuldy.
“Türkmenistan bilen Ýewropa Bileleşiginiň arasyndaky hyzmatdaşlygyň 30 ýyllygy: geljegiň hatyrasyna bilelikdäki işler” atly maslahata birnäçe ministrlikleriň, pudaklaýyn dolandyryş edaralarynyň, we Türkmenistanyň jemgyýetçilik guramalarynyň wekillerini, ýurtda akkreditlenen diplomatik wekilhanalaryň wekillerini, Ýewropa bileleşiginiň maksatnamalarynyň we taslamalarynyň wekillerini bir ýere jemledi.
Umumy mejlisde wise-premýer, Daşary işler ministri Raşid Meredow we ÝB-niň Merkezi Aziýa boýunça ýörite wekili Teri Hakala çykyş etdi. Türkmenistan bilen Ýewropa Bileleşiginiň arasynda köptaraplaýyn hyzmatdaşlygyň oňyn ösüşini bellediler we geljegi barada öz garaýyşlaryny beýan etdiler.
Maslahat bilim, söwda, howpsuzlyk we ýaşyl ykdysadyýet ýaly üstünlikli durmuşa geçirilýän hyzmatdaşlyk taslamalaryna bagyşlanan mowzuklaýyn mejlislerde dowam etdi.
ORIENT news
