Türkmenistanyň gümrükçileriniň türkiýeli kärdeşleri bilen onlaýn-duşuşygy boldy
Türkmenistanyň Döwlet gümrük gullugynyň hem-de Türkiýe Respublikasynyň Gümrük we söwda ministrliginiň wekilleriniň arasynda onlaýn-duşuşyk boldy diýlip, Türkmenistanyň Gümrük gullugynyň resmi saýtynda bellenilýär.
Duşuşygyň dowamynda Ýönekeýleşdirilen gümrük koridory hakyndaky Ylalaşygyň hem-de Bilelikdäki Gümrük komitetini döretmek hakyndaky Teswirnamanyň taslamalaryna seredildi.
Bilelikdäki Gümrük komitetiniň döredilmegi Türkmenistan bilen Türkiýe Respublikasynyň arasynda baglaşylan ikitaraplaýyn ylalaşyklary durmuşa geçirmegiň çäklerinde netijeli gümrük hyzmatdaşlygyny guramaga ýardam bermäge gönükdirilendir.
“Ýönekeýleşdirilen gümrük koridory” taslamasy Türkmenistanyň we Türkiýäniň gümrük gulluklarynyň arasynda harytlar baradaky deslapky maglumat alşygydyr. Bu maglumatlar gümrük barlagy geçirilende ulanylar.
ORIENT news
