Türkmenistan Halkara sergiler býurosynyň indiki mejlisleriniň birini Aşgabatda geçirmegi teklip etdi
2024-nji ýylyň 29-njy aprelinde Pariž şäherinde Halkara sergiler býurosynyň binasynda Edara ediş-býujet komitetiniň nobatdaky mejlisi geçirildi. Bu çärede Türkmenistana ýurdumyzyň Fransiýa Respublikasyndaky Adatdan daşary we Doly ygtyýarly ilçisi, Türkmenistanyň Halkara sergiler býurosynyň ýanyndaky hemişelik wekili Maksat Çaryýew, Söwda-senagat edarasynyň sergiler we ýarmarkalar bölüminiň başlygy Kemal Amanow hem-de Söwda we daşary ykdysady aragatnaşyklar ministrliginiň daşary ykdysady aragatnaşyklary seljeriş bölüminiň başlygy Serdar Atagylyjow wekilçilik etdiler.
Mejlis komitetiň prezidenti, Antigua we Barbudu wekilçilik edýän Karan-Meý Hilliň giriş sözi bilen açylandan soňra bolsa baş sekretar Dimitriý Kerkenztes çykyş etdi. Soňra mejlisiň gün tertibi hem-de 2023-nji ýylyň 19-njy oktýabrynda geçirilen ozalky mejlisiň teswirnamasy tassyklanyldy. Soňra bolsa Gabonyň wekili Edara ediş-býujet komitetiniň başlygynyň orunbasary wezipesine saýlanyldy.
Soňra komitet 2023-nji maliýe ýyly üçin auditoryň hasabatyny diňledi, soňra Expo Osaka 2025 peýdasyna ýygymlar boýunça tölegleriň senenamasyna seredildi. Şeýle hem gün tertibine täze agza döwletleriň töleglerini bellemek baradaky mesele girizildi.
Mejlisiň dowamynda türkmen tarapy geçen ýyl kabul edilen “Türkmenistanda Halkara sergi işini ösdürmegiň 2024-2025-nji ýyllar üçin Konsepsiýasyna” laýyklykda Halkara sergiler býurosynyň indiki mejlisleriniň birini Aşgabatda geçirmegi teklip etdi. Bu teklip komitetiň sekretariaty, şeýle hem agzalary tarapyndan makullanyldy we kabul edildi.
Häzirki wagtda komitetiň düzümine Andorra, Angola, Antigua, Barbuda, Bangladeş, Kipr, Fransiýa, Gabon, Şweýsariýa we Türkmenistan girýär. Geçen ýyl Baş Assambleýanyň 173-nji mejlisinde Türkmenistan Edara ediş-býujet komitetiň agzalygyna saýlanyldy.
ORIENT news
