Zehin bäsleşigi: Türkmen binagärlik-gurluşyk instituty olimpiada gatnaşmaga çagyrýar
Türkmen döwlet binagärlik-gurluşyk instituty Türkmenistanyň we daşary ýurtlaryň ýokary okuw mekdepleriniň talyplarynyň arasynda «Materiallaryň garşylygy» ugry boýunça III Açyk halkara internet olimpiadasyny yglan etdi diýip, TDBGI-niň resmi saýtynda habar berilýär.
Olimpiada gatnaşmaga okuw ugruna we hünärine garamazdan ähli isleg bildirýänler çagyrylýar. Gatnaşyjylary hasaba almaklyk 28-nji marta çenli dowam eder.
Olimpiada 29-njy martda onlaýn tertibinde özbaşdak ýaryşlar görnüşinde geçiriler. Bäsleşigiň geçiş tertibi 6 meseläni öz içine alýar we olary çözmek üçin 120 minut wagt berilýär. Gatnaşyjylar işlemek üçin türkmen, iňlis ýa-da rus dilini saýlap bilerler. Bäsleşigiň ýeňijilerini türkmen we daşary ýurt ýokary okuw mekdepleriniň wekillerinden düzülen eminler topary kesgitlär.
Ýeňijiler I, II we III derejeli diplomlar bilen sylaglanar. Mundan başga-da, meseleleri adaty däl usulda çözen talyplara Ýörite diplomlar gowşurylar. Bäsleşigiň maksady döredijilik ukyplary bolan zehinli ýaşlary ýüze çykarmakdan, nazary bilimleri, amaly endikleri kämilleşdirmekden, şeýle hem ylmy-gözleg işlerine gyzyklanmany artdyrmakdan ybaratdyr.
Olimpiadanyň geçiriliş düzgünleri bilen tanyşmak, şeýle hem hasaba alynmak üçin şu salgy arkaly institutyň saýtyna ýüz tutup bilersiňiz
ORIENT news
