Russiýa sebitlerde hyzmatdaşlygyň täze mümkinçiliklerini açýar
Hyzmatdaş döwletler «Halal» standartlaryna laýyk gelýän rus önümleriniň eksportyny artdyryp, Russiýanyň sebitlerinde gurluşyk üçin girdejili maýa goýup bilerler. Bu barada «Russiýa – Yslam dünýäsi» strategiki göz ýetiriş toparynyň ýolbaşçysy we Tatarystan Respublikasynyň Baştutany Rustam Minnihanow 5-nji martda Moskwada Yslam Hyzmatdaşlyk Guramasynyň (YHG) agza döwletleriň ilçileri bilen geçirilen duşuşykda aýtdy.
«Söwda-ykdysady we maýa goýum gatnaşyklaryny ýola goýmak bilen bir hatarda, biz medeni we ynsanperwer hyzmatdaşlygy hem üstünlikli ösdürýäris. Tatarystan Russiýada yslam bank ulgamyny we maliýeleşdirmek ýörelgelerini ornaşdyrmak üçin synag sebitleriniň biridir, halal önümçiligi ösdürmek boýunça yzygiderli işler alnyp barylýar, yslam bilimine uly üns berilýär» diýip, Rustam Minnihanow belledi.
Bahreýn eýýäm Russiýanyň halal önümlerine gyzyklanma bildirdi, bu bolsa iki ýurduň arasyndaky hyzmatdaşlyga goşmaça mümkinçilikleri açýar. Bahreýniň gurluşykçylarynyň Tatarystandaky gurluşyk taslamalaryna gatnaşmaga çagyrylmagy bu hyzmatdaşlyk gatnaşyklarynyň möhümdigini görkezýär.
Işewürler 2024-nji ýylyň 14-nji maýynda Kazanda geçiriljek «Russiýa – Yslam dünýäsi: KazanForum» atly halkara forumynda hyzmatdaşlygyň mümkinçilikleri barada has giňişleýin maglumat alyp we täze hyzmatdaşlary tapyp bilerler. Bu forum halal senagat, yslam maliýe ulgamy, ulag geçelgelerini ösdürmek, bilim we sport ýaly möhüm meseleleri ara alyp maslahatlaşmak üçin meýdançadyr.
Ýatlatsak, 2022-nji ýylda Kazan şäheri Yslam Hyzmatdaşlyk Guramasynyň Ýaşlar paýtagty diýen derejesine eýe boldy, 2025-nji ýylda bolsa federal häkimýetleriň we Yslam Hyzmatdaşlyk Guramasynyň goldaw bermeginde Birinji Yslam ýaşlar oýunlaryny geçirmek meýilleşdirilýär. Yslam dünýäsiniň 40-dan gowrak ýurdundan 14-16 ýaş aralygyndaky türgenler 20 sport görnüşi boýunça bäsleşerler.
ORIENT news
