Wenanyň Diplomatiýa akademiýasynda türkmen wekiliýeti bilen duşuşyk geçirildi
12-nji martda Wenanyň Diplomatiýa akademiýasynda düzüminde wise-premýer, daşary işler ministri Raşid Meredow, Halkara gatnaşyklary institutynyň rektory Jumamyrat Gurbangeldiýew we Oguz han adyndaky Inžener-tehnologiýalar uniwersitetiniň rektory Gurbanmyrat Mezilow bolan türkmen wekiliýeti bilen duşuşyk geçirildi.
Wenanyň Diplomatiýa akademiýasynyň direktory Emil Briks bilen geçirilen duşuşygyň dowamynda Türkmenistanyň halkara gatnaşyklaryna oňyn Bitaraplyk hukuk derejesi esasynda işjeň gatnaşýandygy bellendi. Suw diplomatiýasy we howanyň üýtgemegi bilen baglanyşykly, şol sanda Türkmenistanyň bu meseleler boýunça öňe süren başlangyçlarynyň çäginde meseleler gozgaldy.
Türkmenistanyň Daşary işler ministrliginiň Halkara gatnaşyklar instituty bilen Wenanyň diplomatiýa akademiýasynyň arasyndaky hyzmatdaşlygyň geljegi barada pikir alyşmak bilen, taraplar halkara gatnaşyklaryny we diplomatiýany, geosyýasaty we ykdysadyýeti öwrenmekde okatmagyň usullaryny kämilleşdirmegiň ähmiýetine ünsi çekdiler. Şeýle hem ýaş diplomatlary alyşmak, mugallymlaryň we talyplaryň tejribe geçmekleri üçin şertleri döetmek we bilelikdäki okuwlary guramak mümkinçiliklerine garaldy.
Mysal hökmünde bellesek, Halkara gatnaşyklary institutynyň okuw merkeziniň binýadynda awstriýaly bilermenleriň gatnaşmagynda öňüni alyş diplomatiýasy, energetika, suw we sanly diplomatiýa boýunça umumy sapaklary we okuwlary guramak teklip edildi.
Duşuşygyň barşynda Türkmenistanyň Daşary işler ministrliginiň Halkara gatnaşyklary institutynyň Diplomatik taýýarlyk boýunça halkara foruma (International Forum on Diplomatic Training/IFDT) girýändigi barada sertifikat gowşuryldy.
IFDT 1972-nji ýylda dekanlaryň we direktorlaryň her ýylky ýygnagy hökmünde akademiki we diplomatik guramalaryň konsorsiumy tarapyndan döredildi. Foruma 56 ýurtdan diplomatik akademiýalar we halkara gatnaşyklar institutlary girýär.
Wenanyň Diplomatiýa akademiýasynyň direktory we IFDT-niň hemişelik egindeş başlygy Türkmenistanyň Daşary işler ministrliginiň Halkara gatnaşyklar institutynyň rektoryny forumyň indiki, 50-nji mejlisine gatnaşmaga çagyrdy. Ol 2024-nji ýylyň ikinji ýarymynda Çernogoriýada geçiriler.
ORIENT news
