Hytaýyň daşary işler ministri döwletiň 2023-nji ýyldaky diplomatik işiniň jemini jemledi we 2024-nji ýyldaky ileri tutulýan ugurlary beýan etdi
Pekin şäherinde geçirilen halk wekilleriniň 14-nji çagyrylyşynyň Ählihytaý ýygnagynyň 2-nji sessiýasynyň çäklerinde HHR-iň daşary işler ministri Wan Iniň metbugat maslahaty guraldy.
Hytaýyň Daşary işler ministrliginiň ýolbaşçysy ýurduň daşary syýasatynyň geçen ýyldaky işleriniň jemini jemledi we şu ýylda ileri tutulýan ugurlary beýan etdi.
Wan Iniň sözlerine görä, Hytaý 2023-nji ýylda Afrika, arap, Latyn Amerika we Aziýa-Ýuwaş umman sebit döwletleri bilen adamzadyň bitewi ykbally jemgyýetini gurmakda täze üstünlikleri gazandy; "Bir guşak, bir ýol" başlangyjynyň çäklerinde Pekinde 3-nji halkara hyzmatdaşlyk forumyny geçirdi; BRIKS döwletara birleşiginiň geňildilmegine ýardam etdi.
Hytaýyň daşary işler ministriniň bellemegine görä, Hytaý geljekde hem açyklyga we inkýuziw diplomatiýa berk ygrarlydygyny görkezer, täze nusgadaky halkara gatnaşyklaryny gurmagy ilerleder we dünýäde hyzmatdaşlygyň gerimini giňelder, özara hormat goýmagy, dürli medeniýetleriň arasyndaky alyşmalary goldar, iri döwletler bilen gatnaşyklarda durnuklylygy saklar, goňşy ýurtlar bilen umumy ösüşi amala aşyrar hem-de ösüp barýan döwletleriň ählisiniň gülläp ösmegine ýardam eder.
Wani I Hytaýyň dünýäde parahatçylygyň, durnuklygyň we ösüşiň bähbitleriniň goragynda durjkadygyny aýdyp, ýurduň halkara giňişligindäki wezipelerine umumy häsiýetnama berdi.
"Bir guşak, bir ýol" başlangyjynyň geljekde hem ösdürilmegi bilen bagly žurnalistiň beren soragyna jogap edip, Wan I Hytaýyň bu başlangyjyň çäklerinde geçen ýylyň oktýabrynda geçirilen 3-nji halkara hyzmatdaşlyk forumynda kesgitlenen wezipeleri durmuşa geçirmegi dowam etdirjekdigini aýtdy. Hususan-da, "Sanly Ýüpek ýoly" we "Ýaşyl" Ýüpek ýoly" taslamalarynyň batly depginde ilerlediler.
Metbugat maslahatynyň barşynda žurnalistler emeli intellekt boýunça Hytaýyň daşary işler ministriniň garaýşy bilen gyzyklandylar. Bu ugruň güýçli depginde gülläp ösýän tapgyra gadam basandygyny bellän Wan I bu babatda döräp biljek howpsuzlyk meseleleriniň ähmiýetini nygtady. Şunuň bilen baglylykda, daşary işler ministri Hytaýyň emeli intelleki ösdürmekde halkara hyzmatdaşlygyny ösdürmek barada taýýarlanylan resminamany BMG-niň Baş Assambleýasyna hödürlemek baradaky meýilleri barada beýan etdi.
ORIENT news
