Halkara Nowruz güni Türkmenistanda 21-nji martda giňden bellener
Ministrler Kabinetiniň penşenbe güni geçirilen mejlisinde wise-premýer Mährijemal Mämmedowa Halkara Nowruz güni mynasybetli Türkmenistanda birnäçe çäreleriň geçiriljekdigi barada hasabat berdi. Bu barada Türkmenistanyň Döwlet habarlar agentligi mälim edýär.
21-nji martda Ahal welaýatynyň Ak bugdaý etrabynyň çägindäki “Nowruz ýaýlasynda” Ahal welaýaty hem-de Aşgabat şäheri boýunça Halkara Nowruz güni mynasybetli baýramçylyk dabarasyny geçirmek bilen bagly degişli taýýarlyk işleri alnyp barylýar. Ýörite meýilnama laýyklykda, türkmen halkynyň Milli Lideri Gurbanguly Berdimuhamedowyň kitaplary, şeýle hem “Nowruznama” kitaby esasynda taýýarlanylan medeni-köpçülikleýin dabaralary geçirmek göz öňünde tutulýar.
Mundan başga-da, bu ýerde özboluşly türkmen obasy döredilip, onda türkmen halkynyň milli däp-dessurlary giňden beýan ediler. Şunuň bilen birlikde, amaly-haşam sungatynyň sergisini, döredijilik toparlarynyň konsertini, milli oýunlary, “Galkynyş” milli at üstündäki oýunlar toparynyň çykyşlaryny guramak meýilleşdirilýär.
Halkara Nowruz güni mynasybetli baýramçylyk dabaralary Türkmenistanyň ähli welaýatlarynda "Türkmeniň ak öýi" binasynyň ýanynda ýaýbaňlandyrylar.
ORIENT news
