Türkmenistan we Rumyniýa bilim ulgamynda hyzmatdaşlygy ösdürmegi maksat edinýär
Ilçi Annamämmet Annaýewiň Rumyniýanyň milli bilim ministriniň orunbasary Ionel-Florian Liksandra bilen bolan duşuşygynda bilim ulgamynda türkmen-rumyn hyzmatdaşlygyny çuňlaşdyrmak meseleleri maslahatlaşyldy. Bu barada Türkmenitanyň Buharest şäherindäki ilçihanasy habar berýär.
Türkmenistan her ýyl Rumyniýanyň ýokary okuw mekdeplerinde bilim almagy üçin ýaşlary iberýär. Munuň üçin döredilýän şertler üçin bilim ministriniň orunbasaryna çuňňur hoşallyk bildirildi. Bellenişi ýaly, rumyn tarapy şu ýyl türkmen ýaşlarynyň ýokary bilim almaklary üçin 105 talyp hakly orunlary bölüp berdi.
Mundan başga-da, türkmen tarapy ýokary okuw mekdeplerinde geçirilýän halkara ylmy maslahatlara we olimpiadalara rumyn mugallymlarynyň we talyp ýaşlarynyň gatnaşmagyna gyzyklanma bildirýär. Öz gezeginde rumyn tarapy hem türkmen ýaşlarynyň gatnaşyp biljek ders olimpiadalarynyň sanawyny ýakyn wagtda iberer.
Duşuşygyň barşynda türkmen diplomaty ýurtda durmuşa geçirilýän ýaşlar syýasaty barada gürrüň berdi.
ORIENT news
