TDHÇMB-niň göçme söwdasynda 107 million dollarlyk geleşikler baglaşyldy
Türkmenistanyň Döwlet haryt-çig mal biržasy sişenbe güni Söwda-senagat edarasynda Owganystandan gelen uly işewür toparynyň gatnaşmagynda geçirilýän owgan harytlarynyň sergisiniň we Türkmen-owgan işewürler maslahatynyň çäklerinde göçme söwda geleşiklerini gurady. Owgan işewürleri TDHÇMB-niň guraýan söwdalaryna işjeň gatnaşyjylar bolup durýandygyny bellemelidiris. Göçme söwdada nebithimiýa, dokma, oba hojalyk pudaklarynyň önümleri, gurluşyk serişdeleri satlyga çykaryldy.
Söwda-senagat edarasynda geçirilen söwdada geleşikleriň jemi 71-si baglaşylyp, 107 milliondan gowrak dollarlyk we 33 milliondan gowrak manatlyk harytlar ýerlenildi.
Göçme söwda owgan wekiliýeti işjeň gatnaşdy: bu ýurduň 51 kompaniýasynyň wekilleri bahasy 58 million dollardan gowrak bolan 29 geleşik baglaşdylar.
BAE-niň, Türkiýäniň, Wirgin adalarynyň, Şotlandiýanyň, Özbegistanyň, Gyrgyzystanyň, Azerbaýjanyň we Türkmenistanyň işewürleri hem söwda geleşiklerini baglaşdylar. Geleşikleriň netijesinde, “ECO-93” görnüşli benzin, “Jet A-1” awiaýangyjy, yşyklandyryş kerosini, ýol bitumy, karbamid, polipropilen, portlandsement, akýan görnüşli aýna, pagta süýümli matalar we elde dokalan türkmen halylary satyldy.
ORIENT news
