Serdar Berdimuhamedow ykdysadyýetde durmuşa geçirilen toplumlaýyn çäreleriň oňyn netijesini belledi
Anna güni geçirilen Hökümet mejlisinde wise-premýer Hojamyrat Geldimyradow Türkmenistanyň şu ýylyň ýanwar-fewral aýlaryndaky makroykdysady görkezijileri barada hasabat berdi.
Döwlet býujetiniň girdeji böleginiň meýilnamasy 107,2 göterim, çykdajy böleginiň meýilnamasy bolsa 97,9 göterim ýerine ýetirildi. Şu ýylyň iki aýynda bölek satuw haryt dolanyşygy, geçen ýylyň degişli döwri bilen deňeşdirilende, 10,5 göterim, daşary söwda dolanyşygy hem 1,1 göterim ýokarlandy.
Türkmenistanyň iri we orta kärhanalarynda ortaça aýlyk zähmet haky, 2023-nji ýylyň degişli döwri bilen deňeşdirilende, 10,3 göterim ýokarlandy. Zähmet haklary, pensiýalar, döwlet kömek pullary, talyp haklary öz wagtynda maliýeleşdirildi.
Prezident Serdar Berdimuhamedow jemi içerki önümiň ösüş depginini ýokary derejede saklamak üçin netijeli işleri geçirmegiň wajypdygyna ünsi çekdi hem-de ministrlikleriň we pudak edaralarynyň önümçilik meýilnamalarynyň doly ýerine ýetirilmegini berk gözegçilikde saklamagy wise-premýere tabşyrdy.
ORIENT news
