Tokioda türkmen parlamentarileriniň we talyplarynyň duşuşygy boldy
Tokioda saparda bolýan Mejlis Başlygy Dünyägözel Gulmanowanyň ýolbaşçylygyndaky Mejlisiň agzalary Ýaponiýanyň ýokary okuw mekdeplerinde okaýan türkmen talyplary bilen duşuşdy.
Parlamentariler ýaşlar bilen geçirilen söhbetdeşlikde “Pähim-paýhas ummany Magtymguly Pyragy” ýylyň şygarynyň ideýasyny we ähmiýetini bellediler, şeýle hem olar ýaşlar babatynda döwlet syýasatynyň hukuk goldawy barada söhbet etdiler. Bu ýerde gürrüň, ýokary bilim almak üçin mümkinçilikleri, we Ýaşlar barada döwlet syýasaty hakynda Türkmenistanyň Kanunynyň täze rejelenen görnüşine girizilen kadalara laýyklykda ýaşlaryň işlemäge, mynasyp durmuş şertlerine eýe bolmaklary üçin döredilen ýeňillikler barada boldy.
Gatnaşyjylara Türkmenistanyň Prezidentiniň “Ýaşlar - Watanyň daýanjy” atly kitaby tanyşdyryldy. Bu barada Mejlisiň web sahypasynda habar berilýär.
Mundan başga-da, türkmen halkynyň Milli Lideriniň ýapon diline terjime edilen “Ömrümiň manysynyň dowamaty” atly kitabynda beýan edilen türkmen-ýapon gatnaşyklarynyň ösüşine üns berildi.
ORIENT news
