Sadyr Žaparow Serdar Berdimuhamedowa beren kömegi üçin minnetdarlyk bildirdi
Şu gün, 6-njy fewralda Türkmenistanyň Prezidenti Serdar Berdimuhamedow Gyrgyz Respublikasynyň Prezidenti Sadyr Žaparow bilen telefon arkaly söhbetdeşlik geçirdi.
Serdar Berdimuhamedow, türkmen halkynyň adyndan we öz adyndan Bişkekdäki ýylylyk elektrosentralynda bolup geçen hadysa bilen baglanyşykly ýagdaýa duýgudaşlyk bildirdi. Serdar Berdimuhamedow Türkmenistan Gyrgyzystana ynsanperwer kömegini iberdi we zerur bolsa ähli kömegi bermäge taýýardygyny bellemek bilen häzirki ýagdaýy ýeňip geçmäge goldaw beriji sözlerini aýtdy we ýylylyk elektrosentralyndaky dikeldiş işleriniň tiz wagtda tamamlanmagyny arzuw etdi. Bu barada “Watan” habarlar gepleşiginde habar berildi.
Sadyr Žaparow, gyrgyz halkynyň adyndan we öz adyndan bu kyn pursatda goldawy üçin minnetdarlyk bildirdi. Gyrgyzystanyň döwlet ýolbaşçysynyň belleýşi ýaly, onuň ýurdy ilkinji bolup kömege gelen Türkmenistan bilen dostlukly gatnaşyklara ýokary baha berýär. Şeýle hem, türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa mähirli salamyny beýan etdi.
Prezidentler ikitaraplaýyn hyzmatdaşlygyň birnäçe möhüm meseleler, şol sanda özüniň ösüşini görkezýän söwda-ykdysady, medeni-ynsanperwer ugurlar boýunça pikir alyşdylar.
Telefon söhbetdeşligi gyrgyz tarapynyň başlangyjy bilen geçirildi.
ORIENT news
