Hökümet mejlisinde goşmaça suw gorlaryny döretmek boýunça işlere garaldy
Wise-premýer Taňryguly Atahallyýew anna güni geçirilen Hökümet mejlisinde ekerançylyk meýdanlarynda ösdürilip ýetişdirilýän oba hojalyk ekinlerine berilýän suw serişdelerini tygşytly we netijeli peýdalanmak, ýerleriň melioratiw ýagdaýyny kadaly derejede saklamak, goşmaça suw gorlaryny döretmek, suwaryş hem-de şor suw akabalaryny arassalamak boýunça degişli işleriň geçirilýändigi barada hasabat berdi.
Prezident Serdar Berdimuhamedow wise-premýere suw serişdelerimiziň tygşytly we maksadalaýyk ulanylmagyna berk gözegçilik etmegi, goşmaça suw gorlaryny döretmek ugrunda alnyp barylýan işleri dowam etdirmegi tabşyrdy.
Ekologiýa gün tertibi barada durup geçmek bilen wise-premýer Atahallyýew döwlet tebigy we çäkli goraghanalarynda ýabany haýwanlary, ýurdumyzda gyşlaýan, göçýän guşlary goramak hem-de seýrek duş gelýän ýabany haýwanlaryň sanyny hasaba almak babatda ylmy-barlag işleriniň alnyp barylýandygyny aýtdy. Daşky gurşawy goramak ministrliginiň döwlet tebigy goraghanalarynda türkmen arçasy, dagdan, pisse agaçlarynyň, aýratyn goralýan tebigy ýerlerde duş gelýän ösümlikleriň seýrek we gymmatly görnüşlerini köpeltmek, olary tebigy ösýän ýerlerinde ýaýratmak boýunça goraghanalaryň ylmy-synag meýdançalarynda ylmy-tejribe işleri geçirilýär.
ORIENT news
