Budapeşt Arkadag şäheri bilen hyzmatdaşlygy ösdürmegi maksat edinýär
Türkmenistanyň Wengriýadaky ilçisi Hemra Amannazarow türkmen-wenger hyzmatdaşlygy, şäherara diplomatiýasyna degişli ýerli ýolbaşçylar bilen birnäçe gepleşikleri geçirdiler. Bu barada Türkmenistanyň Wengriýadaky ilçihanasy habar berýär.
Wengriýanyň Daşary işler ministrliginiň Gündogar hyzmatdaşlygy boýunça Döwlet sekretarynyň orunbasary Adam Şiftir bilen geçirilen gepleşiklerde söwda-ykdysady, medeni-ynsanperwer ulgamlardaky hyzmatdaşlygyň meseleleri maslahatlaşyldy. Taraplar Türkmenistanyň Wenriýadaky we bu ýurduň Türkmenistandaky Medeniýet günleri barada pikir alyşdylar.
Türkmenistanyň Medeniýet günleri we Magtymguly Pyragynyň doglan gününiň 300 ýyllygy mynasybetli geçiriljek çäreler Wengriýanyň Medeniýet ministrliginiň Döwlet sekretarynyň orunbasary Mat Winçe bilen bolan duşuşykda hem ara alnyp maslahatlaşyldy.
Wengriýanyň paýtagtynyň häkiminiň baş geňeşçisi Ýunoş Kendernaý bilen geçirilen gepleşiklerde Budapeşt we Arkadag şäherleriniň arasynda ýakyn hyzmatdaşlyk gatnaşyklaryny ýola goýmak meseleleri maslahatlaşyldy. Birek-birekde guralýan çärelere ýurtlaryň wekiliýet toparlarynyň çagyrylmagy özara gatnaşyklaryň ýakyn binýadyny emele getirýär.
ORIENT news
