ABŞ-nyň ilçihanasy “Fulbraýt TEA” maksatnamasy boýunça arzalary kabul edýär
ABŞ-nyň Türkmenistandaky ilçihanasy 2024-2025-nji ýyllar üçin Fulbraýt mugallymçylyk ussatlygy maksatnamasyna (Fulbraýt TEA) gatnaşmak üçin arzalary kabul edip başlandygyny habar berdi. Bu maksatnama mugallymlar üçin niýetlenendir we olara mugallymçylyk ukyplaryny ýokarlandyrmaga, dersler boýunça bilimlerini çuňlaşdyrmaga we ABŞ barada has köp zat öwrenmäge mümkinçilik berýär.
Iňlis dili, daşary ýurt dilleri, žurnalistika, aragatnaşyk, jemgyýetçilik okuwlary ýa-da STEM (ylym, tehnologiýa, inženerçilik we matematika) derslerini öwredýän bäş ýyllyk iş tejribesi bolan orta mekdep ýa-da bilim merkezleriniň mugallymlary ýüz tutup bilerler. Saýlaw işini üstünlikli tamamlanlar 6 hepdelik Amerikanyň Birleşen Ştatlaryna syýahat ederler we Amerikanyň ÝOM-leriniň birinde intensiw akademiki tälim alarlar, şeýle hem ABŞ-nyň orta mekdeplerinde amaly tejribe geçerler.
Goşmaça maglumatlary we tabşyrmak üçin zerur resminamalary ABŞ-nyň Türkmenistandaky ilçihanasynyň resmi web sahypasynda tapyp bilersiňiz. Arzalary tabşyrmagyň ahyrky möhleti - 16-njy fewral.
ORIENT news
