Türkmenistanyň Prezidenti ýurduň Baş prokuroryny çalyşdy
Türkmenistanyň Prezidenti Serdar Berdimuhamedow ýurduň Baş prokurory Serdar Mälikgulyýewi wezipesinden boşatdy we bu wezipä ýustisiýanyň 3-nji derejeli döwlet geňeşçisi Begmurat Muhamedowy belledi.
Döwlet baştutany, sişenbe güni, 16-njy ýanwarda Türkmenistanyň Döwlet howpsuzlyk geňeşiniň 2023-nji ýyldaky ýurduň harby we hukuk goraýjy edaralarynyň alyp baran işleriniň netijelerine bagyşlanan mejlisinde degişli resminamalara gol çekdi.
Prezidentiň mejlisde aýdyşy ýaly, bu Perman Türkmenistanyň Mejlisi bilen ylalaşyldy. Mälikgulyýew "prokuratura edaralarynyň işini pes derejede gurap, wezipe borçlaryny talabalaýyk ýerine ýetirmändigi üçin" wezipesinden aýryldy.
Serdar Berdimuhamedow Türkmenistanyň Baş prokurory Begmurat Muhamedowa täze wezipesinde üstünlik arzuw edip, kanunyň ýerine ýetirilişine berk gözegçilik edilmeginiň hem-de raýatlaryň hukuklarynyň we azatlyklarynyň goralmagynyň zerurdygyny tabşyrdy.
ORIENT news
